Mampekakaea datu
61
1 Idemi nanina Daudi au napahawe i tadulako toponani hai au raponani hai kecapi.
2 O Pue Ala, pehadingi peraroangku;
Nuhaile pekakaengku!
3 Hangko i wuntu dunia meraroana Irio, lawi lalungku ide mapari hai malede;
Nuninina lao Irio, bulu watungku au mapangka ntepuu,
4 lawi Oiomi au mewali peongaangku,
bente maroho au bara peisa rasuaki iwali.
5 Agingkumi maida i souMua hawe i hae-haena,
bona meongana i woi kapiMu,
6 lawi tou mpuu Nuhadimi dandiku O Pue Ala,
Nuweimona sosoranda tauna au mobilahe hangaMu.
7 Nupamatinuwu datu,
bona kadatuana hawe i pemuleana.
8 O Pue Ala, kuperapi bona ia moparenta i lindoMu hawe i hae-haena.
Nukampai liliu i lalu kamaahiMu au bara mokahopoa.
9 Mewali ina motoiana hangaMu i hae-haena
hai mopabukeina dandiku i alo-alona.