Pekakae i Pue Ala bona monangi iwali
60
1 Idemi nani pepaturona Daudi au napahawe i tadulako toponani hai au raponani moula nani “Bunga Bakung Podandi”.2 Nani ide nauki Daudi i tempona mampombealaa to Aram-Mesopotamia hai to Aram-Soba. I tempo iti, Yoab mesule lawi monangimohe to Edom hampulo hai rosabu kabosanda i lembo Asin.
3 O Pue Ala, Nutendemongkai, Nupogiangaamongkai ranangi;
rumpumoKo irikami kuperapi Nurohongi hulengkai.
4 Tampo Nupopoenggo alana melata.
Nupakaroa hule hinangka au melata, lawi moduami tampo.
5 Nupogiangaamongkai molambi pantodiha au mantimi.
Nupalikangaamongkai halimpuanga nodo tauna au nalangui anggoro.a
6 Tauna au mengkoruhe Irio, Nupopaitaahe tanda datihe ranangi.
Nukampaihe datihe kana rapana.
7 Nuhorema wongkamia hai kuasaMu Nuhanai pekakaengki
bona tauna au Nupokaahi tekabaha.
8 Mongkorami Pue Ala hangko i paidaaNa au malelaha, Nauli,
“Hangangaa menangiNa, hai tampo Sike ina Kukira-kira;
lembo Sukot ina Kutibo-tibo.
9 Gilea Iko ampuna Manase Iko wori ampuna,
Epraim iami labaNgku Yehuda topoparentaKu.
10 Agaiana Moabi iami pobahoiana bitiNgku;
to Edom Kuwedukaahe kandupaKu tanda pewalinda hawiNgku.
Matana-tanaNa lawi monangiNa to Pilistea.”
11 Hema au ina moantina lao i wanua mobente?
Hema au ina moninina lao i wanua Edom?
12 O Pue Ala, barangkai pae Nuporangai?
Pue Ala, barahe pae Nutadulakoi surodadongki?
13 Nutulungi wongkamia hangko i iwalingki,
lawi petulunginda tauna mbero-mbero pea.
14 Ane Naporangaike Pue Ala, ina marohoke i pombeala
lawi Pue monangi iwalinta.