Pekakae i Pue Ala moewa iwali
59
1 Idemi nanina Daudi au napahawe i tadulako toponani hai au raponani moula nani “Inee mepatuna.” Nani ide nauki i tempona Datu Saulu motuduhe taunana mampendenga Daudi i souna bona rapapate.
2 O Pue Ala au kupenombai, kabahana hangko i iwalingku;
kampaina hangko i ope-ope tauna au moewana.
3 Kabahana hangko i tauna au mobabehi dake;
horemana hangko i tauna au mepapate.
4 Lawi ihira tou-tou mpuu mampelea peamona;
tauna au keate hintuwuhe mampoiwalina,
moleri baratona mobabehi dake hai barana madosa, O Pue.
5 Barana masala agaiana ihirari au mampasilolonga
hai maihe mebungka.
MaimoKo, Nupombelambiana hai Nupeitana!
6 Oiomi Pue, Pue Ala au makuasa i humalele dunia,
Pue Ala au rapenombai to Isaraeli.
Pearo, hai Nuhukuhe humalele tauna;
ineehe Nupokaahi tauna au mobabehi dake hai au mopalehiKo.
7 Kakalumbana, iwalingku hawe mbulimohe;
merenggehe nodo dike hai motolelikihe wanua.
8 Peita! Humenda mekakabosai liliu;
dilanda mataru nodo piho,
rapehangu bara ara au mohadi!
9 Agaiana Pue, Nuele-elehe;
humalele tauna Nukakabosaihe.
10 Oiomi rohongku ido hai ina mekingkina Irio.
Pue Ala, Oiomi au mokampaina.
11 Pue Ala ina mai iriko, hai ahina au bara mokahopoa;
ina Napopaitaana iwalingku ranangi.
12 Ineehe Nupapate hambelalau bona dati naliu inaonda hangka to Isaraelingku.
O Pue, Oiomi labangki. Iwalingki Nuhawu-hawuhe;
hai kuasaMu, Nupamanawohe,
13 lawi madosahe i pololitanda,
Pogiangaahe manawo anti pampemahilenda.
Anti peganenda hai pohowaranda dongko.
14 O Pue Ala, ropuihe i lalu pehukuMu,
paonehe duunda ope;
bona raisa tauna: Pue Ala moparenta i olonda pemuleana Yako,
hai poparentaNa hawe i humalele dunia.
15 Kakalumbana,
iwalingku hawe mbulimohe;
merenggehe nodo dike
hai motolelikihe wanua.
16 Mangkahaohe mohaoki paandenda;
ane barahe mabuhu, megoahe.
17 Agaiana iko, ina mamponanina kamarohoMu,
madondo ina matanana anti kamaahiMu au bara mokahopoa,
lawi Oiomi au mewali rohongku,
panggaguangku i lalu kamaparingku.
18 O Pue Ala rohongku, ina mamponanina petoia Irio,
lawi Oiomi benteku.
Pue Ala au kupenombai, Oio au mampokaahina.