Pekakae i Pue Ala bona mohurungi babehianda tauna au kadake
58
1 Idemi nanina Daudi au napahawe i tadulako toponani hai au raponani moula nani, “Inee mepatuna.”
2 Ee tomakuasa, hintimbami pae pebotusimi?
Manotokau pae ane moparesakau tauna?
3 Bara! Agaiana moula peakau tunggaina lalumi mobabehikau dake,
hai taiemi mobabehi pepopeahi-ahi i dunia.
4 Hangko i pesupaana peami, tauna kadake motengkomi;
hangko i karakantimianda peami, topodongko amindami puha.
5 Mobisahe nodo bisa ile,
hai membongohe, nodo ile kobra
6 au bara mampehadingi wotu topotulali au mepalera
ba wotu tauna au mapande mepanara.
7 O Pue Ala ngihinda Nuoru i lalu nganganda,
nuwuka ngihi dikenda O Pue, tauna kadake au nodohe singa.
8 Pogiangaahe matanta nodo owai au moili hai mati!
Pogiangaahe malau nodo hehi i rara.
9 Pogiangaahe magonu nodo kolobue au mewali lenggeru,
hai matehe nodo analei au bara mampaka moita alo.
10 Mole bara raisa, unga peahe mate nodohe rangka kau au pumpu
hangko damani mopamamu kawali, opehe Napapumpu
maroa au mata ba au bangi.
11 Tauna au manoto ina matana, lawi moita pehurungina Pue Ala,
hai ina mobahoihe bitinda i lalu wahenda tauna au kadake.
12 Hai tauna ina mololitahe, rauli, “Tou mpuu tauna au manoto ina molambihe hurungina.
Tou mpuu ara Pue Ala au moparesa ope-ope tauna i dunia hai manoto mpuu pebotusiNa.”