Pekakae merapi tulungi i Pue Ala anti karawulaina iwali
57
1 Idemi nanina Daudi au napahawe i tadulako toponani hai au raponani moula nani “Inee mepatuna.” Nani ide nauki Daudi tempona i lalu lia watu mentabungi hangko i Datu Saulu.
2 Pokaahina O Pue Ala, pokaahi wongkoia,
lawi Irio peana meonga.
Meongana i woi kapiMu
alana liu tempo kapari.
3 Meraroana i Pue Ala au makuasa,
i Pue Ala au mamperuruina.
4 Kuharunga hangko i suruga Pue Ala mohoremana.
Napakaeahe tauna au mopangka-pangkana.
Pue Ala ina mopatongawa ahiNa au bara mokahopoa iriko.
5 Madampana i tanga-tanga singa
au rapeinao mohaka tauna.
Ngihinda nodo tawala hai mata pana,
dilanda nodo piho au mataru.
6 O Pue Ala, patongawa kamakuasaMu i langi,
hai peawaMu i humalele dunia!
7 Iwalingku motaahe dala i rarangku,
hai rapawuntu pekiringku.
Mokaehe kalolu i rarangku,
agaiana ihira haduduanda au manawo i lalu.
8 O Pue Ala, timamami lalungku; masilolonga mpuumi lalungku;
ina monanina, ina motoiana hangaMu.
9 O watangku, pearomide. Ee gambus hai kecapi, pearomide!
Ina moruana sowea hai nani petoia i Pue Ala.
10 O Pue, ina mopahawena kamatanana lalungku Irio i olonda humalele tauna,
hai monanina motoiaKo i olonda ope-ope tauna i dunia.
11 Lawi kamahilena ahiMu hawe i langi,
hai ahiMu au bara mokahopoa hawe i laerawa.
12 O Pue Ala, patongawa kamakuasaMu i langi
hai peawaMu i humalele dunia!