Pepoinalai i Pue Ala i lalu kamasusa
56
1 Idemi nanina Daudi au napahawe i tadulako toponani moula nani, “Tadasi manggebodo hangko i kau tarbantin au karao.” Nani ide nauki Daudi i tempona rahaka to Pelisiti i Gat.
2 O Pue Ala, pokaahi wongkoia lawi rapangka-pangkana tauna;
hahangaloana rabungka hai rapamapari iwalingku.
3 Hahangaloa rapangka-pangkana iwalingku,
rabungka hai rapamaparina bosa tauna anti pampemahilenda.
4 I kalangangku,
mepoinalaina Irio.
5 Kutoia Pue Ala, anti podandiNa;
mepoinalaina Iria, idomi hai barana langa.
Apa pae au peisa rababehi manusia iriko?
6 Hahangaloahe mopahalabataka lolitangku,
hai kadake liliu tunggaianda iriko.
7 Mentabungihe ina mobungkana; rakamata peami apa au kubabehi
rahaoki katepakanda mopapatena.
8 Ina Nuhorema manihe pae hangko i kakadakenda?
O Pue Ala, patunahe ope-ope tauna au kadake i lalu karumpuMu.
9 Paringku Oiomi au moimba-imba;
owai matangku Nuisa imbana.
Ope-ope iti bara pae Nuuki haha?
10 I tempoku meraroa Irio, iwalingku ina mousulihe;
hai pousulinda iti kupoinalai anti kanaperuruingku Pue Ala.
11 Kutoia Pue Ala anti podandiNa.
Kutoia Pue anti podandiNa.
12 Mepoinalaina i Pue Ala idomi hai barana langa.
Apa pae au peisa nababehi tauna iriko?
13 O Pue Ala, dandiku Irio ina kupabukei,
hai popenomba katana lalu ina kuhuhu Irio.
14 Lawi Nuhoremamona hangko i kapate,
lumbunami Nuninimona i polumaoangku datina tehube.
Ido hai kubuku molumao i lindoMu, Pue Ala,
i lalu pewangka katuwo.