Pekakae i lalu pombeala
55
1 Idemi nani pepaturona Daudi au napahawe i tadulako toponani hai au raponani hai kecapi.
2 O Pue Ala, Nupehadingi pekakaengku;
inee wongkoia Nupentabongoa pamperapiku.
3 Hailena hai Nuhanaina!
Momudu pondaku hai moteriana anti kawulungangku.
4 Kawio-wio lalungku mohadi ponganga-nganganda iwalingku
hai pepopeahi-ahinda tauna au kadake.
Anti babehianda, maparina;
hai anti kamasekenda, rapoiwalina.
5 Wiora lalungku,
lawi narumpana pelangakina kapate.
6 Nabalungkuhina kalanga,
moradana hai narumpana kawulunga.
7 Pekiringku, “Ane mokapina nodo tadasi manggebodo,
ina membarona mohaoki paidaa au lene.
8 Hai ina padu karaona,
hai maidana i pada wungi au boa.
9 Hoholigana mohaoki pentabungiangku
hangko i angi mata hai alimuru.”
10 O Pue, Nupawulihe hai Nupamagunego pololitanda,
lawi kuitami kamaseke hai pombembehehe i lalu wanua.
11 Mabaa hai kaindi, wanua iti ratolelikimi lawi ranangimi;
i laluna ara kapari hai kapate.
12 Iumba-umba pea ara pepakarugi.
I sou pebotusia, indo wori mewali pepopeahi-ahi hai peakalangi.
13 Ane iwalingku mopapakoina,
kubuku mani mohalea.
Ane tauna au mokahihina mampempemahile iriko,
peisa mani kupentabungia.
14 Agaiana oiori au mampoiwalina, au hungku ntepuuko iriko,
himadangku au kupoinalai.
15 Hangkoia maroa pohimadanta,
hai himbela peamoke lao menomba i souna Pue Ala.
16 Pogiangaahe iwalingku mate hangka
hai pogiangaahe mendaulu tuwo-tuwo i paidaa tomate,
lawi dake ara i sounda hai i olonda.
17 Agaiana meraroana i Pue Ala
hai Pue ina mohoremana.
18 Madondo, pualo hai kalumba, wulungana hai moteriana
hai Nahadimi wotungku.
19 Naperuruina
hangko i pebungkanda iwalingku,
lawi bosahe mombembeula moewana.
20 Pue Ala au hangkongkoianami moparenta
ina mampehadingina hai mopaiwoihe iwalingku,
lawi barahe mampenosoi salanda
hai barahe langa i Pue Ala.
21 Himadangku iti moewami ope-ope tauna au mampohintuwua;
ia molingkaimi dandina.
22 Lolitana momi meore-ore,
agaiana i laluna ara pekahihi.
Polololitana maalusu
agaiana metohu.
23 Paisare kabata-batana lalumu i Pue,
hai ina Naharongiko,
lawi tauna au manoto barahe hambela
Napalikangaa ranangi iwalinda.
24 Agaiana Oio, Pue Ala, ina Nunawohe
i kalolu au melangaki kamalobuna.
Hinangka topeakalangi hai topepapate,
bara ngkalanga tinuwunda.
Agaiana iko, mepoinalaina Irio.