Kakadakena manusia
53
1 Idemi nani pepaturona Daudi au napahawe i tadulako toponani moula nani Mahalat.
2 Tauna au ntuli mololita i laluna, nauli,
“Bara ara Pue Ala.”
Babehianda kadake hai merikai;
barapi huba hadua au mobabehi roa.
3 Hangko i suruga,
Pue Ala mampetiro tauna.
Ba ara mani tauna au matopa i peitana Pue Ala?
Ba ara mani au mohaoki Ia?
4 Ope-opemohe mokaraohi Pue Ala hai kadakemohe;
barapi huba hadua au mobabehi roa.
5 Nauli Pue Ala,
“Barahe pae mampekiri tauna au mobabehi dake iti?
Mohihipi peahe taunangku,
hai barahe mekakae Iriko.”
6 Tauna kadake ina rumihi kalanganda,
moleri barato ara au melangaki,
lawi Pue Ala moropuihe iwali au motolelikikau, hai buunda Nahawu-hawu.
Ihira Naaemohe Pue Ala,
idomi hai ninangihe.
7 Taperapi hangko i Sion bona mai topehoremanda to Isaraeli!
Ane Pue Ala mopamaroa hule katuwonda taunaNa,
pemuleana Yako ina matanahe;
hai to Isaraeli ina motoia Pue Ala anti kamatananda.