Daudi mopangaku dosana i Pue Ala
51
1 Idemi nanina Daudi au napahawe i tadulako toponani2 i kanakambaroana nabi Nata anti pokara-karana hai Batseba.
3 O Pue Ala, pokaahi wongkoia moula kamaahiMu au bara mokahopoa,
hai Nuumpahi dosangku moula pekiraiMu au mahile!
4 Nubahoiana hinangka kamasalangku,
hai Nupamalelahana hangko i dosangku.
5 Lawi kuisami kamasalangku,
hai dosangku kupepekiri liliu.
6 Irio pea, Irio peana madosa,
hai mobabehina apa au kadake i peitaMu
bona tongawa notoMu i pebotusiMu;
hai manotoKo i lalu pehukuMu.
7 Tou mpuu rapoanakana i lalu kamasala,
hai nakantimiana inangku i lalu dosa.
8 Oio mampokatanaKo kanoto lalu;
Nubukehi lalungku hai kanoto pekiri.
9 Nuweihaa wongkoia dosangku hangko i watangku bona malelahana;
bahoina bona kabulangku melumbu hangko i kakawu.
10 Nupalikangaa wongkoia matana-tana, hai Nupogiangaa lalungku
au Nupamapepemi ide matana hule.
11 Ineemi Nupeita dosangku;
Pue, woemide hinangka kamasalangku.
12 O Pue Ala, Nupamalelahana;
Nuwouki lalungku hai roho au tetida.
13 Ineena Nutende hangko i lindoMu
hai inaoMu au malelaha, inee Nuala hangko iriko!
14 Nupamatana mbulina, anti kaNuhoremangku,
hai Nuweina kabula lalu bona matunduna Irio.
15 Ido hai NgkoraMu ina kupaturoahe tauna au madosa,
duunda meula hule Irio.
16 O Pue Ala, Topehoremangku, kabaha wongkoia
hangko i dosangku au mohubimona tauna rapapate,
bona matanana mobambari notoMu.
17 O Pue, tulungina mololita
bona mopahawena hinangka petoia Irio.
18 Lawi baraKo mounde popenomba au rasambale;
rapana mohuhuna popenomba au raintu,
bara wori Nupokatana.
19 Popenomba au napokatana Pue Ala iami lalu au mapepe;
lalu au mengkoru hai menoso,
bara Nuae.
20 O Pue Ala, patongawa kamaroaMu i Sion;
Nuaro hule hinangka bente i Yerusale!
21 Ane nodo, ina mampokanaKo popenomba au hintoto hai peundeaMu
nodo wori ope-ope popenomba au raintu.
Japi laki ina rapopenomba mbuli i wongko pohuwea popenomba Irio.