Penomba au manoto i Pue Ala
Nani petoiana Asaf
50
1 Pue Ala, au makuasa mongkora hai mokakio tauna i humalele dunia,hangko i Mata alo hawe i katampuana.
2 Hangko i Sion, wanua au merae ntepuu,
mewangkami Pue Ala i peawana.
3 Maimi Pue Ala au tapenombai hai bara ina roo-roo.
IoruNa ara api au rore,
hai Ia natoleliki alimuru au rumihi.
4 Ia mokakio langi hai dunia,
bona mosabiki poparesaNa taunaNa.
5 Nauli, “Antihe mai tauna au Kupokaahi hai au Kupileimi,
au modandimohe Iriko; dandinda iti narohongi hai popenombanda au rasambale.”
6 Langi mobambari kamanotoNa,
lawi Pue Alami haduduana topebotusi.
7 “Ee taunaNgku, nipehadingi! Ina mongkoraNa.
Ee, to Isaraeli, ina mololitaNa kana i babehiami;
Ikomi Pue Ala au nipenombai.
8 Barakau Kukambaroa anti popenombami au rahuwe;
Barakau Kusalai anti binata au nisambale hai nihuwe liliu i lindoKu.
9 BaraNa moparaluu japi hangko i lambaramu
ba towau laki hangko i gimpumu.
10 Lawi hinangka binata au i pandulu
hai binata i isabuna bulu, Iko ampuna.
11 Hinangka tadasi i laerawa Kuisa hahahe,
hai hinangka au tuwo i pada au maemba,
arahe i lalu kuasaNgku.
12 Ane rapana marimiNa, barapokau Kuuliangaa,
lawi dunia hai hinangka ihina, Iko ampuna.
13 PaandeKu bara onto japi laki,
hai paenuNgku bara wahe towau laki.
14 Niuli ngkaia kamaroana i Pue Ala anti kamatanami,
hai nipabukei dandimi i Pue Ala au makuasa!
15 Meraroakau Iriko i lalu kapari;
ina Kuhoremakau hai ina nitoiaNa.”
16 Agaiana i tauna au kadake, Pue Ala mongkora, node,
“Moapari pane mopahawekau aturaNgku
hai mampopololitakau podandiKu,
17 moleri mokahihikau pekambaroaNgku
hai moaekau hinangka hawaNgku?
18 Ane moitakau topanangka, niporangaimi;
hai mampohimadakau topebualosi.
19 Nipobiasami mohowara lolita au kadake,
hai nipontamami meakalangi.
20 Mongkora-ngkorakau wutumi hai adimi,
hai mopakadakekau wata halalumi.
21 Itimi au nibabehi, agaiana mandii-ndii peaNa;
nipehangu poantiKu himbela hai ikamu.
Agaiana ina Kukambaroakau, hai babehiami ide ina Kupatongawa i lindomi.
22 Nipailalu lolitaNgku ide, ikamu au barapokau mokatuinao Pue Ala;
bona datikau Kupakarugi hai bara ara au mehorema.
23 Hema au manguli ngkaia kamaroana Iriko anti kamatanana laluna, itimi popenomba au mampomahileNa.
Hema au manoto rarana,
pehorema hangko Iriko ina Kupopaitaa.”