Katana au mbero-mbero
49
1 Idemi nani petoianda to Korah au rapahawe i tadulako toponani.
2 Nipehadingi, ee humalele tauna,
nitaa talingami ope-ope au maida i dunia:
3 maroa tauna au tepaiwoi tuwona ba tauna au teadai,
maroa au meahi-ahi ba au pebuku!
4 Ina mohowarana lolita au manoto;
kaladu mpuu pampekiringku, itimi au ina kuhowara.
5 Ina mopailaluna pepaturonda toiorunta,
hai ina kupakanoto lempona hai nani kecapi.
6 Barana langa i tempoku molambi kapari
hai ratolibuna iwali au kadake;
7 ihira au moharungahe anu-anunda,
hai kapebukunda rapampemahilei.
8 Katouana bara huba hadua au nabuku mohorema watana ba halaluna,
ba mohurungi pehoremana Pue Ala.
9 Lawi masuli mpuu baiarina karahoremana katuwona,
hai bara ara au nabuku mobaiari,
10 bona ia tuwo liliu
hai bara moita kalolu talumba.
11 Tou mpuu ina raita: tauna au matopa ina mate.
Tauna au bara habu hai au ntuli melewa worihe,
hai parewanda rapalehiahe tauna ntanina.
12 Talumbanda iami sounda i hae-haena,
iti wori au rapaidai pemuleanda
nauri hangkoia ngkaia tamponda.
13 Agaiana tauna, kehapiri pebuku, barahe mantaha
nodo peahe pinatuwo au ina mate.
14 Nodomi kahopoana katuwonda tauna au meharunga pea i watanda haduduanda,
nauri rakatuinao manihe i kamapandenda molololita.
15 Nodohe dimba au monontohi paidaa tomate,
hai nakadipurahe kapate.
Liliuhe mendaulu i talumba,
watanda magoro;
dunia tomate mewali paidaanda,
karao hangko i sounda au meawa.
16 Agaiana Pue Ala ina mokabaha watangku
hangko i kuasa kapate,
lawi ina Nahoremana.
17 Ineeke mahina, ane hadua mewali pebuku,
hai anu-anuna tetambai.
18 Lawi ane matemi, hinangkana iti bara ina naanti;
kapebukuna bara ina ratawu hihimbela hai watana.
19 Nauri maroami katuwona anti kapebukuna
hai rapopolingami tauna
anti kangkaiana anu-anuna,
20 agaiana batena pea mokulele totuana
lao i paidaa au makaindi hawe i hae-haena.
21 Tauna au mampomahile pea kapebukuna, bara manoto pekirina;
ia himbela hai binata au ina mate.