Sion, wanuana Pue Ala
48
1 Idemi nani petoianda to Korah.
2 Meawa mpuu Pue hai rumihi karatoiaNa
i wanuana Pue Ala au tapenombai
i bulu au malelaha.
3 Bulu Sion au malelaha, melolu hai merae ntepuu,
hai rapokatana humalele tauna.
Bulu Sion iami wanuana Datu au mahile
au karao ntanda i Raa.
4 Pue Ala maida i bente kadatuaNa
hai mopatongawa kaIanami au mokampai.
5 Peita datu-datu moteruhumohe,
ina maihe mebungka.
6 Agaiana i poitanda bulu iti, wulihe hai tingkarahe.
Anti kalanganda, melangkahe kaiumba-umbanda.
7 Morada-radahe anti kalanganda,
hai mapari rahadi nodo towawine au ina moana,
8 hai nodo kapala tahinda to Tarsis
au marupu narumpa angi mata.
9 Nodo au tahadimi, nodo wori au taitami
iami peawa i wanuana Pue au Makuasa,
wanuana Pue Ala au tapenombai,
au nakampai Pue Ala duuna i hae-haena.
10 I lalu souMu,
O Pue Ala, kikatuinao ahiMu au bara mokahopoa.
11 HangaMu tebambari hai ratoiaKo i humalele dunia;
moparentaKo
hai taie koanaMu moula kamanotoMu.
12 Tauna au maidahe i Sion
hai ope-ope wanua i Yehuda, pogiangaahe matana-tana,
lawi manoto pehukuMu.
13 Toleliki Sion,
hai nuimba manarana.
14 Nupeita maroa-roa walana,
nuparesa bentena,
bona nituntuahe pemuleami.
15 Pue Ala iami Pue Ala,
au tapenombai hawe i hae-haena,
Iami au monini liliuke.