Pue Ala, Datu humalele dunia
47
1 Idemi naninda to Korah au rapahawe i tadulako toponani.
2 Ee tauna i humalele dunia, mohapa-hapakau
hai mogee-geekau mampomahile Pue Ala i lalu katana-tana.
3 Lawi Pue au Makuasa melangaki,
iami Datu mahile i humalele dunia.
4 Ia mampopengkoru ngamba-ngamba i kuasanta,
ope-ope tina Napopeampuhe irikita.
5 Ia mampileiamoke tampo au tapososora.
Rapokatana pemuleanahe Yako au Napokaahi.
6 Mohudami Pue Ala i kadera kadatuaNa
naula pogee-gee hai pomoni tatamburu.
7 Niponanimi petoia i Pue Ala; Niponani petoia!
Niponanimi petoia i Datunta, Niponani petoia!
8 Lawi Pue Ala iami Datu humalele dunia;
Nitoiami hai nani pepaturo!
9 Pue Ala iami Datu au moparenta humalele tauna.
Pue Ala mohuda i kadera kadatuaNa au malelaha.
10 Ope-ope tadulako i dunia teruhuhe,
mewalihe taunana Pue Ala au napenombai Burahima.
Lawi Pue Alami ampuNa ope-ope datu i dunia;
meruu mpuu karapomahileNa.