Pue Ala iami rohonta
46
1 Idemi naninda to Korah au rapahawe i tadulako toponani moula nani “Alamot”.
2 Pue Ala iami peongaanta hai rohonta
au motulungi liliuke i lalu kapari.
3 Idomi hai barake langa,
nauri dunia ide mabika hai ope-ope bulu manawo i lalu tahi.
4 Barake langa nauri rumihi balumbana hai owaina mowire,
hai ope-ope bulu modua-dua anti balumbana.
5 Wanuana Pue Ala au malelaha, iami paidaaNa au Makuasa;
inditi ara hambua owai moili au mopamatana lalunda tauna au maida inditi.
6 Pue Ala maida inditi, mewali wanua iti bara ina magero.
Hungku mabaa tauna au maida i wanua iti ina natulungi Pue Ala.
7 Humalele tauna i dunia mohiho-hihohe hai ope-ope kadatua magunego.
Ia mampopahadi wotuNa alana marupumi dunia.
8 Pue au makuasa i humalele dunia mamporangaike;
wanua benteta iami Pue Ala au napenombai Yako.
9 Maikau, nipeita apa au napobago Pue;
ami rumihi pelangakina au nababehi Pue i dunia!
10 Iami au mampopengkaroo pombeala hawe i wuntu dunia.
Ia au mopamatepo pana hai mopamakulu tawala;
Ia mohuwe hinangka laba pombeala.
11 “Mandiimokau hai niisami, Ikomi Pue Ala!
Iko rapomahile i olonda humalele tauna, hai rapomahileNa i dunia.”
12 Pue au makuasa i humalele dunia mamporangaike,
wanua benteta iami Pue Ala au napenombai Yako.