Nani karataunana datu
45
1 Idemi naninda to Korah au rapahawe i tadulako toponani. Nani pekakae ide moula nani “Bunga Bakung.”
2 Lolita au maalusu melumbea hangko i lalungku.
Mopahawena watingku i datu,
dilangku nodo potolona guru tulisi au mapande.
3 Oiomi datu au makara ntepuu i olonda ana manusia.
Kamaahi tehowara hangko i humemu,
idomi hai nawatiko Pue Ala i hae-haena.
4 Ee, datu au maroho! Patakamide pihomu
i lalu kamarohomu hai peraemu.
5 I peraemu hai kamarohomu, meangkamoko lao mopatogo
kanoto, kahintimba hai pengkaiwoi.
I kamakuasamu, babehimide hinangka babehia au mahile.
6 Mata panamu mataru haha, ina motohu hulenda iwalina datu;
humalele tauna ina meampuhe irio.
7 Kadatuamu Pue Ala ampuna, bara ina mokahopoa,
hai moparentako taunamu i lalu kahintimba.
8 Moundeko kanoto hai mokahihiko dake,
idomi hai natawiko Pue Ala au nupenombai,
hai lana tanda kaNapileimu, au melumbu hangko i himadamuhe.
9 Ope-ope hampimu moengaa peami lana mawongi au hangko i mire, gaharu hai cendana
i sou kadatuamu au rababehi hangko i gading; nani hai kecapi mopamatanako.
10 I olonda towawine au rapokakaia arahe anantowawinena datu.
Ntanda i koanamu meangka towawinena datu au mampohampi bulawa hangko i Opir.
11 Ee anantowawine, pehadingi hai peita.
Ineemohe nukakatuinao tinamu hai au i sounahe umamu.
12 Pogiangaamide datu mentaka laluna irio anti kamakaramu.
Ia tobalilomu, mengkorumoko iria.
13 To Tirus, ina maihe moanti pepomahilenda irio.
Ope-ope tauna au pebuku ina mangala laluhe irio.
14 Rumihi mpuu peraena anantowawine datu iti mesua i lalu sou kadatua,
hampina rampisi-mpisii bulawa.
15 Hai waru au makara batina, anantowawine iti raanti lao i datu;
ia raula anantowawine, himadanahe
au rakakiohe meporangai.
16 I lalu kamatana hai pepomahile,
raantihe mesua i lalu sou kadatua.
17 Anamuhe hangalo ina mopahuruhe totuanda mewali datu.
Oio au ina mampopewalihe to makuasa i humalele dunia.
18 Ina kupatolele hangamu hawe-hawe i pemuleamu;
Idomi hai humalele tauna i dunia ina mampokatanako hawe i hae-haena.