Pekakae merapi pekampaina Pue Ala
44
1 Idemi nani pepaturonda to Korah au rapahawe i tadulako toponani.
2 O Pue Ala, kihadi ntalingami
apa au rapahawe totuangki
kana i kamakuasaMu au Nupatongawami
i katuwonda toiroungki hangkoia.
3 Anti kamakuasaMu, tauna ntanina Nuwurahe
bona tamponda rapaidai liliu taunaMu.
Ope-ope tina ntanina Nupakarugihe,
agaiana taunaMu Nupopemule-mulehe.
4 Bara anti kamatopanda mopake piho pane rabuku mampaidai tampo iti
Bara anti kamarohonda pane monangihe iwalinda,
agaiana anti kamarohonari taie koanaMu hai pewangkaMu,
lawi ihira iti taunaMuhe au Nupokaahi.
5 O Pue Ala au kupenombai,
Oiomi Datungku au mopaara penangina Yako.
6 Anti kaNuporangaingki, kinangihe ope-ope iwalingki.
Hai anti hangaMu, kiihe-ihemohe tauna au moewangkai.
7 Lawi barana meharunga i panangku,
hai pihongku bara mopaara penangingku.
8 Agaiana Oiomi au mampopenangingkai hangko i ope-ope iwalingki,
hai tauna au mokahihingkai Nupakaeahe.
9 Anti kaPue Alana, hahangaloangkai mamponani nani petoia.
Hai kipahawe liliu katana lalu Irio,
10 agaiana ide-ide Nutendemongkai hai Nupogiangaangkai ranangi iwalingki,
hai barapoKo mamporangai surodadongki.
11 Nupalikangaangkai mousuli hangko i iwalingki,
hai ope-ope tauna au mokahihingkai mopamuruhe anu-anungki.
12 Nuhuhungkai nodo dimba au rasambale,
hai Nuhawu-hawungkai i olonda tauna i humalele dunia.
13 Nupobalu mbero-mberohe taunaMu
hai baraKo moala rasiMu hangko i pampobalu iti.
14 Nupopewalingkai rapopowoo-woo hintonggiki;
rakakabosai hai raele-elengkai tauna au arahe i holangki.
15 Nupogiangaangkai rauli-uli i olonda tauna i humalele dunia,
ope-ope tina molili-liliahe waanda hai rapapakoingkai.
16 Hahangaloa rakakabosaina
hai ea motabungi lindoku,
17 lawi lolitanda iwali hai topepailalu
mepakaea hai mepakadake.
18 Nauri ope-ope ide morumpamongkai, agaiana baraKo naliu inaongki,
hai dandiMu bara kilingkai.
19 Lalungki mentaka Irio,
hai polumaona katuwongki bara mehupe hangko i raraMu.
20 Agaiana Nupalehingkai i paidaa serigala,
hai Nubalungkuhingkai kamakaindi.
21 Ane rapana naliumi inaongki hangana Pue Ala au kipenombai
hai mopaisarengkai katuwongki i anitu,
22 bara pae naisa Pue Ala?
Lawi Ia au moisa hinangka tunggaia lalu.
23 Anti kaOiona, rapopara peamongkai rapapate
nodongkai dimba au ina rasambale.
24 O Pue, mearomoKo! Moapari hai letaKo?
Ineengkai Nutende liliu.
25 Moapari hai mentabungiKo?
Moapari hai barapi Nukatuinao pepopeahi-ahi hai pepohawi irikami?
26 Katuwongki tetabungimi i lalu awu,
tepalumbamongkai i tampo.
27 MearoKo hai maingkai Nutulungi!
Nuhoremangkai anti ahiMu au bara mokahopoa.