Sura Kadua
(Petoia 42–72)
Kamabila i Pue Ala
42
1 Idemi nani pepaturonda to Kora au rapahawe i tadulako toponani.
2 Nodo lagiwa mohaoki owai au moili,
nodomi tanoanangku mokabilaiKo, O Pue Ala.
3 Tanoanangku mokabilai Pue Ala
au tuwo.
Impiramona peisa lao
menomba i lindoMu?
4 Mampoeno liliuna owai matangku
maroa mabaa ba kaindi,
lawi hahangaloa tauna mekunehe iriko,
“Iumbami Pue Ala au nupenombai?”
5 Idemi au ina kukatuinao
i tanga kawiorangku;
noumba polumaongku iorunda tauna bosa
monontohi souna Pue Ala,
hai wotu au magora-gora hai nani petoia i Pue Ala,
i tanga karame-ramea tauna au mosusa.
6 O tanoanangku, moapari hai mapari gagako?
Moapari hai wiorako?
Peharungamide i Pue Ala, lawi ina motoia mbulina Pue Ala,
Topehoremangku au kupenombai.
7 Pekiringku terimbiki i lalu tuwongku,
idomi hai kukatuinaoKo
hangko i tampo owai Yarade hai bulu Hermon,
hai hangko i bulu Mizar.
8 Humalele tahi mombekakakio
nodo porumuku owai au melumpa.
Hinangka himburu hai balumbaMu
tewiwilolo mobalumbangina.
9 I tempo mabaa Pue mopatongawa kamaahiNa iriko,
hai kaindi monanina motoia Pue Ala.
Mekakaena Iria, pongkana katuwongku.
10 Meraroana i Pue Ala, benteku au maroho,
“Moapari hai naliuna inaoMu?
Moapari hai mantodihana
i pepopeahi-ahinda iwalingku?”
11 Nodo petambuku kapate au tiri-tiri buungku,
lawi iwalingku mokakabosaina;
hai hahangaloa tauna mekunehe iriko,
“Iumbami Pue Ala au nupenombai?”
12 O lalungku, moapari hai mapari gagako?
Moapari hai wiorako?
Peharungamide i Pue Ala, lawi ina motoia mbulina Pue Ala,
Topehoremangku au kupenombai.