Pekakae merapi pepakaoha
41
1 Idemi nanina Daudi au napahawe i tadulako toponani.
2 Morasimi tauna au motulungi tauna malede hai au mapari,
ia ina nahorema Pue i tempona marugi.
3 Ia ina nakampai Pue hai Nakadipura katuwona,
alana Napamaroa katuwona i dunia,
hai bara Nahuhu i iwalina.
4 Pue ina motulungi i tempona mahai,
hai Napakaoha mpuumi hangko i hakina.
5 Kuuli, “O Pue, pokaahina
hai pakaoha wongkoia, lawi madosamona Irio.”
6 Iwalingku mohowarahe au kadake kana iriko, rauli,
“Impirami taia mate hai tunami hangana?”
7 Tauna au maihe mosondakina, mampololitahe dongko;
mai peahe mampeita paringku
hai lao rapopololita kaiumba-umbana.
8 Ope-ope tauna au mokahihina, mombekakanenihe kana iriko.
Motangara liliuhe dake iriko, rauli,
9 “Ia narumpami haki au mepapate.
Ane napaturuami, barapi ina mearo-aro.”
10 Mogalori himadangku au kupoinalai
au maandeto paandeku,
napalehiwomona.
11 Agaiana Oio Pue, pokaahi wongkoia hai Nupakarohona,
bona kubuku mohurungi dakenda iwalingku.
12 Ane barana ranangi iwalingku,
kuisami kaNupokaahingku.
13 Anti kabulana lalungku Nuharongimona,
hai Nuweina katuwo hihimbela hai Oio i hae-haena.
14 Toiami Pue, Pue Ala au rapenombai to Isaraeli!
Toiami Pue mepongka ide-ide hawe i hae-haena!
Amin, Amin.