Petoia hai Pekakae
40
1 Idemi nanina Daudi au napahawe i tadulako toponani.
2 Sabara mpuuna mampepegia Pue,
ido hai Nakamatana hai Napehadingimi peraroangku merapi tulungi.
3 Naorena hangko i kalolu kapate;
hangko i reta au monangko.
Napopeangkana i wowo bulu watu,
ido hai manotomi polumaongku.
4 Napaturoana nani au wou,
nani pepomahile i Pue Ala au tapenombai.
Bosa tauna ina moita apa au nababehi Pue,
ido hai langahe hai mepoinalaihe Iria.
5 Morasimi tauna
au mepoinalai i Pue,
hai au barahe meula i poantinda tauna
au mampemahile ba i tauna au modongkohe.
6 O Pue, ngkaia mpuu au Nubabehi irikami. O Pue Ala au kupenombai,
bara ara kasimbelaMu.
Hai tunggaiaMu irikami au mewulii
barapi kibuku mobambari ope-ope.
7 BaraKo mounde popenomba binata au rasambale hai popenomba paande,
agaiana talingangku Nubungkahimi bona kuhadi wotuMu.
Popenomba au rahuwe hai popenomba popoampungi dosa bara Nuhaoki.
8 Mewali mololitana, “Tou mpuu, idemona.
Kana iriko teukimi i lalu Ngkorana Pue.”
9 Kuunde mampeulai peundeaMu, Pue;
hawaMu kupailalu.
10 O Pue, kupahawe kamanotoMu
i poteruhunda taunaMu au bosa.
Humengku bara mengka-ngkaroo mobambari.
Ope-ope iti Nuisa haha.
11 Bambari kabulana laluMu bara kuwuniangi.
Petulungi hai pehoremaMu kubambari liliu.
AhiMu hai kamanotoMu bara kukandiika
i taunaMu au bosa.
12 O Pue, ineeKo mohomboki kamaahiMu iriko,
kuperapi ahiMu hai kamanotoMu mokampai liliuna!
13 Lawi natolibuna kapari
au barapi teimba kangkaiana.
Nawulaina hinangka dosangku,
alana barapi kubuku moita rara au manoto.
Kangkaiana dosangku melumbu hangko i weluangku,
idomi hai barapi ara peharungangku.
14 O Pue, kuperapi maahiKo mokabahana;
Nutulungina holiga.
15 Pogiangaahe maea hai kamongi-mongi
ope-ope tauna au rapeinao mopapatena.
Pogiangaahe mousuli hai rapakaea ope-ope tauna
au mohaoki kamarugingku.
16 Pogiangaahe tauna au moele-elena
mewalihe langa hai maea.
17 Kuperapi bona ope-ope tauna au menomba Irio matanahe.
Hai bona ope-ope tauna
au mokabilai pehoremaMu
mololita liliuhe, rauli, “Makuasa mpuu Pue.”
18 Ide iko mapari hai meahi-ahina,
agaiana nakamata liliuna Pue.
O Pue, Oiomi au motulungina hai mohoremana;
ineeKo mawewe!