Pekakae merapi tulungi
39
1 Idemi nanina Daudi au napahawe i Yedutun, tadulako toponani.
2 Nauli lalungku, “Ina mokampaina watangku,
datina madosa i pololitangku;
barana ina mololita
hungkana tauna kadake ara mani i lindoku.”
3 Mandii-ndiina, barana mololita,
momuntu peana
agaiana pantodihangku tetambairi kamantimina.
4 Morada lalungku anti kawulungangku;
kakupepekiria karurumihiari kamasusangku,
hai kahopoana mololitana:
5 “O Pue, uliangaana impira kahopoana katuwongku,
hai hampa iumba tampana tinuwungku
bona kuisa kadana monono watangku.”
6 Sosoe mpuu kaNupakanotona tinuwungku,
katuwongku hampalai pea i lindoMu,
hai ope-ope tauna nodo peahe pewui himburu i peitaMu.
7 Tauna nodo pea bao-bao au moliu!
Mampohihoi peahe au mbero-mbero.
Hai morampu peahe anu-anu dunia, agaiana bara raisa hema au ina mampopobundu hangalo.
8 Agaiana ide-ide apa au kupepegia, O Pue?
Irio peana meharunga.
9 Kabahana hangko i hinangka kamasalangku;
ineena Nupopewali pekakabosainda tauna au ntuli.
10 Mandii-ndiina hai barana mololita,
lawi Oiomi au mokambaroana.
11 Kuperapi Nuingihi pehukuMu hangko iriko,
lawi pehukuMu ina kupomatemi.
12 Ope-ope tauna Nukambaroahe
hai Nuhukuhe anti kamasalanda,
peraenda Nupakarugi nodo tagara au morugii anu-anu;
katouana ope-ope tauna nodo peahe pewui himburu i peitaMu.
13 O Pue, pehadingi pekakaengku
hai peraroangku merapi tulungi.
IneeKo mandii-ndii ane Nuitana moteria,
lawi topolilo peana au mentoe Irio
nodohe ulu bubungku!
14 Ineena Nuhaile hai karumpuMu
bona matanana
hangko damanina padu hai barapona ara.