Pekakae i lalu kapari
38
1 Idemi nanina Daudi au nauki i tempona mohuhu popenomba i pokatuinaona dosana.
2 O Pue, ineena Nuhuku i lalu karumpuMu,
hai ineena Nupopeahi-ahi, anti karumihina karumpuMu.
3 Lawi watangku belami natohu mata panaMu;
taieMu toami morimbikina.
4 Ontoku ope mahai anti karumpuMu;
hinangka buungku ope malede anti kamadosangku.
5 Kamasalangku lumbumi waangku;
hinangkana nodo halea mantimi au mapari gagami kuhadi.
6 Hinangka belangku moengaami
hai monanami anti kantuliku.
7 Rumihimi kabungku-bungkuku;
hahangaloa wiora peami lalungku.
8 Lawi pekongku mangkamudumi;
hai ontoku opehe mahai.
9 Opemi rohongku hai maparimi pehadingku,
meraroana anti kamasusana lalungku.
10 Pue, Nuisa haha peundeaku,
hai peraroangku bara tewuniangi Irio.
11 Hulengku morada-rada, matalami rohongku,
hai petotokingku barapi hawe.
12 Hihimadangku hai rangangku mengkambeihahe anti hakingku,
hai rakaraohina hahalalungku.
13 Tauna au mampeinaohe mopapatena motaahe watika;
tauna au mampekiri peamohe kamarugiangku hai kamanawoangku,
hahangaloahe motangara lalu peakalangi.
14 Agaiana iko, nodona tobongo au barapi mehadi;
nodona tontuli au bara mololita;
15 nodona tauna au bara mehadi,
idomi hai barana mehahanai.
16 Lawi Iriomona meharunga O Pue;
Oiomi au ina mehana, O Pue, Pue Ala au kupenombai.
17 Kuuli, “Inee peahe matana-tana anti kamanawongku.
Ineena rapampemahilea ane raitana madampa.”
18 Ina manawomona anti katehubengku,
hai paka narumpana haki.
19 O Pue kupangaku kamasalangku;
karao inaongku mampekiri kamadosangku.
20 Tauna au mampoiwalina, ngkaia imbanda hai marohohe;
bosa mpuuhe tauna au mokahihina, nauri bara ara pongkana.
21 Ihira mohurungi roangku hai dake,
rapoiwalina lawi mohaokina au maroa.
22 O Pue, Pue Ala au kupenombai, ineena Nukalambahi;
ineeKo karao hangko iriko!
23 Holigana Nutulungi,
O Pue, Topehoremangku!