Katuwonda tauna au kadake hai tauna au maroa
Hangko i Daudi
37
1 Inee rumpu anti babehia tauna au kadake;inee mahina i tauna au mobabehi sala.
2 Lawi holigahe malute nodo hehi,
hai polo malauhe nodo tuda-tuda au malewau.
3 Poinalaimi Pue, hai babehimi au maroa;
maida roomokau i tampo au nadandimi Pue, hai matundumokau.
4 Nuhaokimi kamatanamu i Pue,
hai Ia ina mopabukei peundeana lalumu.
5 Paisare katuwomu i Pue hai mepoinalaiko Iria,
hai Ia ina motulungiko.
6 Ia ina mopatongawa kamanotomu nodo pewangka alo membeto
hai kabulana lalumu nodo kamabaa i pualo mbongo.
7 Nupatindami lalumu hai nupegiami Pue,
ineeko mahina ba tesalempori pekirimu i tauna
au molambi rasi i katuwonda, anti peakalanginda.
8 Ineemoko masodo hai karumpumu nukabaha.
Ineemoko rumpu lawi iti batena moantike i kakadakea.
9 Lawi tauna au mobabehi dake ina rapatuna,
agaiana ope-ope tauna au meharungahe i Pue, ina mampososora tampo au nadandimi Pue.
10 Lawi barapi mahae ina tunahe tauna au kadake;
Ane nuhaokihe i paidaanda, barapohe ara.
11 Agaiana ope-ope tauna au mengkaiwoi, ina mampososorahe tampo au nadandimi Pue,
hai ina molambihe roa ngkatuwo au melabi-labi.
12 Tauna au kadake, motangara dake i tauna au manoto,
hai petotokinda mepopalanga peami.
13 Agaiana Pue moele-ele tauna au kadake iti,
lawi Naisa hungkumi kahopoana tuwonda.
14 Tauna au kadake mowuka piho
hai moumbuhe pananda,
bona modungkahe tauna au mapari hai topeahi-ahi;
tauna au manoto ina rapapate wori.
15 Agaiana pihonda ina mopapate watanda sadudua,
hai pananda ina ratepo.
16 Mobundu maniri anu-anu au haodi i tauna au manoto
pane kapebuku i tauna au kadake.
17 Lawi kuasanda tauna au kadake ina natepo Pue,
agaiana Pue moharongi tauna au manoto.
18 Pue moisa hai mokampai katuwonda tauna au malelaha,
hai sosoranda monono hawe i hae-haena.
19 Barahe ina maea i lalu kapari,
hai ina mabuhuhe i tempo rimi.
20 Katouana ope-ope tauna au kadake batenda ina maropu;
iwalina Pue nodo peraena bunga i tanga mpada,
ina tunahe nodo rambu.
21 Tauna au kadake mohinta, hai bara raisa mampopesule,
agaiana tauna au manoto maahi lalunda.
22 Ope-ope tauna au nawati Pue, ina mampososorahe tampo au Nadandimi,
agaiana tauna au Nagane ina Napatuna.
23 Pue monini tauna i rara au hintoto napolumaongi,
hai katuwonda tauna au Napokana Napakaroho.
24 Nauri manawo, barahe ina marugi,
lawi Pue mokingki taiena.
25 Hungkaku mangura hawe kukasaengi,
bara mani hambela kuita Pue mokalambahi tauna au manoto,
ba mampogiangaahe ananda hawe i ampunda mewalihe topehuhe-huhe.
26 Alo-alona mepokaahi hai bula laluna rapampeboloi;
hai pemuleana mewali pewati iria.
27 Karaohi au kadake hai nubabehi au maroa.
Ane nodo nubabehi, oio hai pemuleamu
ina mampaidai liliukau tampo au nadandimi Pue.
28 Lawi Pue mounde babehia au manoto,
hai bara mokalambahi tauna au Napokaahi.
Tekadipurahe hawe i hae-haena,
agaiana pemuleanda tauna au kadake ina rapatuna.
29 Ope-ope tauna au manoto ina mampososorahe tampo au nadandimi Pue,
hai maida liliuhe indo hawe i hae-haena.
30 Tauna au manoto, mapande mohowara lolita pepaturo;
apa au napololita batena tou.
31 Hawana Pue Ala napailalu,
hai maroho poingka-ingkana, hai bara mehupe-hupe.
32 Tauna au kadake molelemata liliu tauna au manoto,
hai nahaoki peami napapate.
33 Agaiana Pue bara mohuhu tauna au manoto i lalu taienda iwali,
hai i temponda raparesa, barahe Napogiangaa rapakisala.
34 Peharungamide i Pue hai peulai hawaNa;
ane nodo nubabehi, Pue ina moweiko tampo au Nadandimi mewali sosoramu,
hai ina moitako tauna au kadake rapatuna.
35 Moitana hadua tauna au kadake hai mampemahile
au maroa katuwona nodo hampoa kau himburu i Libanon.
36 I tempoku mbuli melempo, tauna iti barapi ara;
kuhaoki, agaiana barapi kulambi.
37 Nipeita tauna au maroa hai manoto laluna,
lawi i tauna au mounde kahintuwu ina ara katuwo au maroa.
38 Agaiana ope-ope tauna au madosa ina rapamaropuhe,
hai pemuleanda ina rapatuna.
39 Ope-ope tauna au manoto nahoremahe Pue,
Iami pempaisareanda i lalu kapari.
40 Pue motulungi hai mohoremahe;
Napeparaihe hangko i taienda tauna au kadake,
hai Nakabahahe lawi meharungahe Iria.