Kakadakenda tauna hai kamaahina Pue Ala
36
1 Idemi nanina Daudi, hawina Pue, au napahawe i tadulako toponani.
2 Dosa mololita i laluna tauna au kadake;
kalangana i Pue Ala bara huba ara.
3 Anti karumihina pampomahilena watana haduduana,
ido hai bara naisa kamasalana hai bara mampenosoi babehiana.
4 Pololitana kadake hai buke peakalangi,
barapi mampekiri mobabehi noto hai roa.
5 Dake napepekiri i paturuana,
babehiana, bara ara au maroa;
hai dake bara ara au naae.
6 O Pue, kamaahiMu hawe i langi
hai kamaroaMu hawe i gawu.
7 O Pue, kamaroaMu melolu nodo bulu au tepamapangka;
kamanotoMu kaladu nodo tahi au maemba.
Manusia hai pinatuwo Nukadipurahe.
8 O Pue Ala, mahile mpuu karaholoina ahiMu au bara mokahopoa,
tauna meongahe i woi kapiMu.
9 Mabuhuhe hai paande au melabi-melabi i souMu,
hai Nupaenuhe owai hangko mata i owaiMu au mopakaoha kamangkadou.
10 Oio pea pongkana katuwo,
i lalu kamabaaMu, moitamongkai baa.
11 Kuperapi Nupaliliu ahiMu au bara mokahopoa i tauna au mepoinalai Irio,
hai kamanotoMu Nupatongawa liliu i tauna au bula laluna.
12 Ineena Nupogiangaa rapangka-pangka tauna au mampemahile,
ba rawurana tauna au kadake.
13 Peita noumba kamanawonda tauna au mobabehi dake,
rahepekahe hai barapi rabuku mearo.