Nani petoia anti penangina datu
21
1 Idemi nanina Daudi au napahawe i tadulako toponani.
2 O Pue, matanami datu, lawi Nurohongi watana.
Rumihi mpuu kamatanana, anti kaNuweina penangi.
3 Apa au natunggai, Nupabukeiami,
hai au naperapi bara Nuae,
4 lawi Nudoko hai pewati au handaka.
Songko kadatua au hangko i bulawa Nusongkoia.
5 Ia mamperapi katuwo Irio hai Nuwei;
tinuwuna Nupangkalanga hawe i hae-haena.
6 Anti kaNupopenangina hangko i iwalina, rumihi mpuu karabilana.
Kameawa hai katolele Nukiraiami.
7 Nuwati liliu katuwona,
kamatanana tepabukei anti kaNuporangaina.
8 Anti pepoinalaina datu i Pue
hai kamaahiNa au makuasa, maroho mpuu peangkana.
9 TaieMu ina mohaka ope-ope iwaliMu
hai taie koanaMu ina motawani tauna au mokahihiKo.
10 O Pue, i kahaweMu,
ina Nupapumpuhe i lalu api au lolaa.
KarumpuMu ina moamehe,
hai ina naandehe api.
11 Ananda hai ampunda ina Nupatunahe hangko i dunia,
hai pemuleanda ina Nuropuihe hangko i olonda manusia.
12 Ane ara lalunda moewa hai moakalangi datu,
tunggaianda iti bara ina mewali.
13 O Pue, ina Nupopelangkahe,
lawi Nupenotohe hai panaMu.
14 KitoiaKo Pue anti kamakuasaMu;
monaningkai mampomahile hinangkana au Nubabehi i kamarohoMu.