Pekakae i kamapari
22
1 Idemi nanina Daudi, au napahawe i tadulako toponani bona raponani moula nani lagiwa au nawangka sowea.
2 Pue Alangku, Pue Alangku! Moapari hai Nupalehina?
Mekakiona, agaiana mia-miaKo karao,
hai barana Nutulungi.*
3 Pue Ala au kupenombai, mabaa mekakiona, agaiana baraKo mehana,
hai nodo wori kaindi, bara tinda pekiringku.
4 Moleri Oiomi datu au makuasa hai malelaha
au ratoiaKo to Isaraeli.
5 Iriomohe toiorungki mepoinalai,
meharungahe hai Nuhoremahe.
6 Iriomohe merararoa hai Nupatuwohe,
meharungahe Irio, hai barahe Nupogiangaa maea.
7 Agaiana ide iko tabulu peana; barana manusia;
rapopowoo-woona hai raele-elena tauna bosa.
8 Ope-ope tauna au moitana, mokakabosaina;
rapapakoina i pololitanda, hai molili-liliahe waanda,
9 rauli, “Ia mamporoho Pue,
pogiangaa Pue au mokabaha.
Ane napokatana Pue
hangangaa Nahorema.”
10 O Pue, Oiomi au mampopesupana hangko i karakantimiangku,
hai Nupatuwona i tambokana inangku.
11 Hangko i pesupangku, rahuhumona Irio.
Hangko i kanakantimiangku inangku,
Oiomi Pue Ala au kupenombai.
12 IneeKo karao hangko iriko,
lawi ina narumpana kapari,
hai bara ara au metulungi.
13 Iwalingku motolelikina nodohe japi laki.
Japi laki au mailahe hangko i Basan motolibuna.
14 Ralindona iwalingku,
nodohe singa au mehaka hai moau.
15 Kamalede-ledeamona nodo owai au mabubu.
Hinangka buungku malehomi;
lalungku magonu nodo taru.
16 Opemi rohongku nodo kori tampo au bangi.
Dilangku mentaka i karangku,
hai nodomona tomate au ratawu.
17 Ratolelikimona tauna kadake,
nodohe dike hamporangaa.
Taiengku hai bitingku ratohumi.
18 Ope-ope buungku peisami kuimba.
Ratototokina iwalingku hai rapepelenggena.
19 Mokira-kirahe hampiku, hai motendehe dadu
bona manoto kahemana au molambi.
20 O Pue, ineeKo karao hangko iriko.
Tulungina holiga, lawi Oiomi rohongku.
21 Nuhoremana hangko i mata mpiho;
Nupeparaina hangko i iwalingku au mowulaina nodo dike.
22 Nukabaha wongkoia hangko i tandu japi laki
hai hangko i nganga singa.
Nuhanaimi pekakaengku!
23 Ina kupatolele hangaMu i hahalalungku.
I pogulua taunaMu, kutoiaKo.
24 Ikamu au mengkoru i Pue, nitoiami;
ope-opekau pemuleana Yako, nipomahilemi Pue.
Ikamu pemuleanakau Isaraeli, molingkudumokau i lindoNa.
25 Lawi Ia bara mampokarika tauna au meahi-ahi.
Barahe Nakamata mbero i kamaparinda, hai barahe Napentabungia.
I temponda merapi tulungi Iria,
Napehadingihe.
26 KutoiaKo i olonda tauna au mepoinalai Irio.
Dandiku ina kupabukei i lindonda tauna au mengkoruhe Irio.
27 Tauna au meahi-ahi ina maande hai mabuhu.
Tauna au mohaoki Pue ina motoia Ia.
Ina maroa katuwonda hawe i hae-haena.
28 Ope-ope tauna i humalele dunia ina mokatuinaohe Pue
hai mesulehe menomba Iria.
Hai hinangka tina i dunia
ina molingkuduhe i lindoNa.
29 Lawi Puemi ampu hinangka kadatua,
Ia au moparenta tina-tina i humalele dunia.
30 Ope-ope tauna au mampemahile, ina motumpahe menomba Iria.
Ope-ope tauna hangangaa mate,
hai bara ara au nabuku moumpuki katuwona.
Ina molingkudu hahahe i lindoNa.
31 Ope-ope pemuleanda ina menombahe Iria,
hai ina mobambarihe
kana i Pue i pemuleanda.
32 Ina mopahawehe kana i kamanotona Pue
i tauna au ina mesupahe hangalo,
lawi Pue mohoremami taunaNa.