Datu rapekakaea bona menangi
20
1 Idemi nanina Daudi au napahawe i tadulako toponani.
2 Tapeperapi Pue mohanaiko i tempomu meraroa,
hai kuasana Pue Ala au napenombai Yako mampeparaiko.
3 Tapeperapi Napakatu mai petulungi irio hangko i souNa au malelaha
hai Naharongiko hangko i Sion.
4 Tapeperapi Nakatuinao hinangka popenombamu,
hai mampokana hinangka au nuhuhu Iria.
5 Tapeperapi Naweiko apa au nupeinao,
hai Napabukeiako hinangka au nutangara lalu.
6 Ikami mampokatanangkai penangimu,
hai moorengkai bandera petoia i Pue Ala.
Tapeperapi Pue mopabukei hinangka pamperapimu.
7 Ide-ide kuisa Pue mowei penangi i tauna au Natawimi,
hai Nahanai hangko i paidaaNa au malelaha.
Ido hai molambi penangi au mahile, anti kamakuasaNa.
8 Ara tauna au mamporoho kareta mpombeala,
ara wori tauna au mamporoho dara mpombeala,
agaiana ikita mamporoho peake kuasana Pue Ala au tapenombai.
9 Madungkahe hai manawohe,
agaiana ikita mearoke hai maroho peangkata.
10 O Pue, Nuwei penangi i datu!
Nuhanaingkai i tempoki meraroa!