Peawana pobagona Pue hai aturaNa
19
1 Idemi nanina Daudi au napahawe i tadulako toponani.
2 Langi mopatongawa peawana Pue Ala,
hai laerawa mobambari pobagoNa.
3 Alo-alona peawaNa iti rapahawe liliu.
Wengi-wengina kamakuasaNa iti batena rakabelai.
4 Barahe molololita,
hai wotunda bara tehadi,
5 agaiana bambari iti tehawukami i humalele dunia,
hai ngkora iti rapahawemi i ope-ope tauna iumba pea kaaranda.
Pue Ala mobabehi paidaana alo i langi.
6 Madondo-dondo mesupa nodo hadua toratauna tobalilo
au mesuwu hangko i lincuna,
hai nodo hadua surodado au mampepongka polumaona i lalu kamatana.
7 Ia au mampolumaongi langi
mempongka i pembetoana hawe i katampuana.
Bara ara au tebambaongaki
hangko i kamapana pesimbakina.
8 Parentana Pue iti bara ara kamakurana,
hai mopakaroho lalunda tauna.
Ngkorana Pue peisa rapoinalai,
hai mowei noto i tauna au bara mongilo.
9 Aturana Pue manoto,
hai mopalindo lalu.
Hawana Pue iti malelaha,
hai mopamanoto pekiri tauna.
10 Ane menombake i Pue,
maroa mpuu hai bara mokahopoa.
Aturana Pue tou hai i paka-pakana manoto,
11 melumbu peawana hangko i bulawa,
kamomina meliu hangko i tinaha.
12 Paka-pakana aturaMu iti mampopaingaamohe hawiMu,
hai tauna au mampeulai, timamami sarona au mahile.
13 Hema pae au mangisa kamasalana?
O Pue, Nukabahana hangko i dosangku au bara kuoaka.
14 Nupakarao wongkoia hangko i dosa au kuoaka kubabehi;
ineena Nupogiangaa nakuasai dosa iti
bona tuwongku malelaha
hai tekabahana hangko i kamasala au mahile.
15 O Pue, kuperapi Irio
bona apa au kupekiri hai au kuhowara hintoto hai peundeaMu.
Oiomi rohongku hai topehompoku.