Nani kamatanana Daudi
18
1 Idemi nanina Daudi au napahawe i tadulako toponani. Daudi iti, hawina Pue au mopahawe nani ide i kanakabahana Pue hangko i taiena Saulu hai ope-ope iwalina.
2 Nauli, “KupokakaiaKo, O Pue,
lawi Oiomi rohongku.
3 Pue iami benteku au maroho,
pentabungiangku hai topehoremangku.
Pue Ala au kupenombai,
Ia nodo bulu watu au kupeongai.
Ia labangku hai rohongku
au mampeparaina hai mokampai liliuna.
4 Mekakiona i Pue au hintoto ratoia,
idomi hai tekabahana hangko i iwalingku.
5 Tewewehina hai koloro kapate
hai nalaboana hinangka au mepakarugi.
6 Tehiluna hai kariri kapate,
hea kapate arami i lindoku.
7 I lalu kamaparingku, meraroana i Pue.
I Pue Ala au kupenombai, merapi tulungina.
Hangko i souNa au malelaha, Nahadi wotungku.
Peraroangku au kuwambaka hawemi Iria.
8 Moringkimi tampo hai modua,
moenggo-enggomi hinangka biti bulu,
anti karumihina karumpuNa.
9 Hangko i ongeNa,
mesuwu rambu, hangko i ngangaNa,
mesupami api au mawaa.
10 Nabikami langi hai mendaulu;
gawu au makaindi ara i woi bitiNa.
11 Ia mesawi i kerub
hai Ia membaro i wongko himburu.
12 Napaara kamakaindi mobalungkuhi wataNa;
Ia natoleliki gawu au makumba.
13 Anti pewangkana kila au hangko Iria,
mahungkami gawu, hai manawomohe uda watu hai api.
14 Pue mowotu hangko i langi nodo gumpata.
Kebuu mpuu wotuNa Pue au makuasa.
15 Napanakami mata panaNa ope-ope,
alana mahawumohe iwaliNa.
Kila Napopombehangke-hangke
alanda magunego.
16 Tongawami kakaladuna tahi,
anti kaNuarohanda iwaliMu.
Tebungkahimi pohudaa dunia,
anti pewusina inao hangko i ongeMu.
17 Hangko i kapangkaaNa, Pue moona taieNa
Nakingkina hai Naorena hangko i owai kaladu.
18 Naperuruina hangko i iwalingku au maroho,
hai hangko i ope-ope tauna au mokahihina,
lawi maroho mpuuhe hangko iriko.
19 I tempoku molambi pari, rapoiwalina,
agaiana Pue mewali pempaisareangku.
20 Nakabahana hangko i kapari,
hai Nahoremana lawi Napokakaiana.
21 Pue mohurungi babehiangku moula kamanotongku.
Nawatina hintoto hai kamalelahana babehiangku.
22 Lawi kuula liliu rarana Pue;
barana mobabehi dake
hai barana mekabaha Iria.
23 Hinangka aturaNa kupailalu,
hai ope-ope hawaNa bara kukabaha.
24 Poantiku bara kedai i peitaNa,
hai watangku mokaraohi kamasala.
25 Ido hai Nahurungiana Pue iriko moula notongku
hai kamalelahana babehiangku i peitaNa.
26 I tauna au matundu liliu Irio, Nukampai liliuhe.
Hai i tauna au manoto, Nupatongawa kamanotoMu.
27 I tauna au malelaha Nupatongawa kamalelahaMu,
agaiana tauna au motengko laluna,
ina Nupenggoli-nggoliahe anti kamatopaMu.
28 Lawi Oiomi au mohorema tauna au mengkaiwoi,
agaiana Nupaiwoi tauna au mampemahile.
29 Lawi Oio au mampopewangka hulongku,
Pue Ala au kupenombai, Oio au mopamabaa kamakaindiku.
30 Anti kaNuporangaingku, baina moewahe iwalingku.
Hai anti petulungina Pue Ala au kupenombai,
peisana melumpa lao i lalu bentenda.
31 Rarana Pue Ala manoto;
dandina Pue tou hai peisa rapoinalai.
Iami labanda ope-ope tauna
au meharunga Iria.
32 Hema au makuasa ntepuu?
Batena pea Pue Ala. Bara ara au ntanina.
Hema au taporoho?
Batenami Pue Ala au tapenombai.
33 Iami Pue Ala au morohongina,
hai mopakanoto rarangku.
34 Ia au mopakaroho bitingku nodo kamarohona biti lagiwa,
bona kubuku meangka i wowo bulu.
35 Napaguruna mombeala,
alana kubuku moumbu pana
au rababehi hangko i tambaga.
36 Nuweina laba pehoremaMu,
kamakuasaMu moharongina.
KamaahiMu mopamahilena.
37 Nupamalelaha rarangku
au ina kupolumaongi, datina manawo.
38 Iwalingku kuwulaihe hai kunangihe,
barana mesule ane bara manihe kupaope.
39 Kudungkahe alana barapi rabuku mearo,
madampahe hungku i bitingku.
40 Nuweimona roho pombeala;
Nupopeampumohe iwalingku iriko.
41 Nupamabalihe iwalingku hangko iriko,
hai ope-ope tauna au mokahihina kupapatehe.
42 Monganga-ngangahe merapi tulungi, agaiana barahe ara au motulungi,
meraroahe i Pue, agaiana bara mehana.
43 Kugilihe maluha-luha nodo awu au nawui himburu,
hai kutendehe nodo reta i rara.
44 Nukabahana hangko i tauna au moewana;
Nuweina kuasa motadulakoihe tauna i humalele ngamba.
Tauna au barahe kuisa mewalihe hawingku.
45 Hangko wotungkuto rahadi
mengkorumohe iriko,
hai hawangku rapeulai haha.
46 Kapebainda matantami,
hai ane mesuwuhe hangko i bentenda, moradahe.
47 Pue tuwo! Tetoiami Pue Ala pentabungiangku,
hai tepakahilemi Pue Ala, Topehoremangku.
48 Pue Ala iami au mampehuruana,
hai mampopeampuhe humalele ngamba i kuasangku.
49 Iami au mohoremana hangko i iwalingku.
Nupopenangina hangko i tauna au moewana,
hai Nuperuruina hangko i tauna au maseke.
50 Ido hai kupomahileKo, O Pue, i olonda tauna i humalele ngamba,
hai monanina motoia hangaMu.
51 Pue Alami au mowei penangi au mahile i datu au Napileimi,
hai Ia mopatongawa kamaahiNa i tauna au Natawimi,
iami Daudi hai ope-ope pemuleana hawe i hae-haena.”