Pekakaena tauna au manoto laluna
Pekakaena Daudi
17
1 O Pue, pehadingi;meraroana merapi noto hangko Irio.
Pehadingi pekakaengku
au hangko i kabulana lalungku.
2 O Pue, Nuperuruina hangko i kara-karangku,
lawi Oiomi au moisa apa au tou.
3 Ane Pue mampetandaka lalungku
hai moparesana i tempona kaindi,
bara ina Nulambi hampaka dake
hai kupakanotomi kadangku mobabehi dosa
i polololitangku.
4 Kana i babehianda tauna au kadake, bara kupeulai,
agaiana moulamona NgkoraMu au Nupahawe.
Watangku kukampaimi
datina moula raranda tauna au maseke.
5 Polumaona katuwongku batena moula paturoMu,
hai polingka-lingkana bitingku manoto;
barana mehupe-hupe.
6 O Pue Ala mekakiona Irio lawi Nuhanaina.
Nuhailena mai, hai Nupehadingi lolitangku.
7 Nupetudungia kamaahiMu au mahile,
lawi Oiomi au mopatuwohe tauna au meharunga Irio
bona Nukampaihe hangko i topeewa.
8 Nukadipurana nodo ogu mataMu.
Nuwunina i woi kapiMu
9 hangko i tauna kadake au mobungkana
hai hangko i iwalingku au motolibuna
au mampeinaohe mopapatena.
10 Kamaahinda bara ara,
pololitanda mantindora.
11 Iumba pea kalaoangku, raula liliuna ide-ide ratolelikina.
Hai raula mata bona radungkana i tampo.
12 Ihira nodohe singa au raunde peami mehaka
Nodohe singa au maroho
au melawa i paidaa au mawuni.
13 O Pue, pokalemide.
Nuewahe iwalingku hai Nunangihe.
Nuperuruina hai mata mpihoMu
hangko i tauna au kadake.
14 O Pue, Nuhoremana hai kuasaMu
hangko i tauna au mohaoki peahe anu-anu i dunia.
Nupamabuhuhe hai pehukuMu
au Nupasilolongaamohe
hawe-hawe i ananda hai pemuleanda.
15 Agaiana iko, anti kadangku masala, ina kuitaKo.
Hai ane mearona, matana lalungku, lawi ina kuita lenggeMu.