Tauna au manoto laluna molambi roa ngkatuwo
Nani petoiana Daudi
16
1 Nukampaina O Pue Ala,lawi Irio peana meonga.
2 Mololitana i Pue, “Oiomi au makuasa i lalu katuwongku;
hinangka au maroa au ara iriko, batena pea hangko Irio.”
3 Ope-ope tauna au malelaha tuwonda au maida i tampo ide,
ihirami au merae hai au kupokatana.
4 Katetetambaiari kamaparinda tauna au mampenombaihe anitu;
barana mau mohuhu popenombaku i anitunda,
hai bara ina kukakabelai hanganda.
5 O Pue, Oiomi au kupososora i katuwongku.
Hinangka au ara iriko, Oiomi au mokiraiana.
Katuwongku ara i lalu kamakuasaMu.
6 Merae mpuu tampo au Nuwatiana,
au mopamatana lalungku
hai au mewalimi kupososora.
7 Kutoia Pue au mopaturo liliuna;
mogalori kaindi, lalungku naponotoa paturoMu.
8 Kukatuinao liliu Pue;
Lawi Napohiolaa peamona, idomi hai maroho liliu lalungku.
9 Idomi hai matana lalungku, tanoanangku motoia Pue Ala
hai watangku molambi paidaa au lene.
10 Lawi Oio Pue, bara Nupogiangaa watangku maida i lalu dunia tomate.
TaunaMu au malelaha bara Nupogiangaa moita kapate.
11 Nutudungiana rara au monontohi katuwo.
Irio molambina katana mahile.
I taie koanaMu, ara rasi au kupotuwo hawe i hae-haena.