Kakadakenda tauna
14
1 Idemi nanina Daudi au napahawe i tadulako toponani.
Tauna au ntuli mololita i laluna, nauli,
“Pue Ala bara ara.”
Babehianda kadake hai merikai;
barapi huba hadua au mobabehi roa.
2 Hangko i suruga, Pue mampetiro tauna.
Ba ara mani tauna au matopa i peitana Pue Ala?
Ba ara mani au mohaoki Ia?
3 Ope-ope tauna melumbu gagami kakadakenda,
barapi huba hadua au maroa babehiana.
4 Nauli Pue, “Barahe pae mampekiri ope-ope tauna au mobabehi dake?
Mohihipi peahe taunaNgku
hai barahe hambela mekakae Iriko.”
5 Ihira itimi au narumpa kalanga au rumihi.
Agaiana Pue mamporangai tauna au mengkoru Iria.
6 Tauna au kadake mohombokihe tunggaianda topeahi-ahi,
agaiana Pue mamperuruihe i lalu katuwonda.
7 Taperapi hangko i Sion bona mai topehoremanda to Isaraeli!
Ane Pue mopakaroa katuwonda taunaNa,
pemuleana Yako ina matanahe, hai to Isaraeli ina motoia Pue anti kamatananda.