Pue iami pengkatuhua tauna
11
1 Idemi nanina Daudi au napahawe i tadulako toponani.
Iko ide meharungana i Pue;
noumbari pane baikau mololita iriko, niuli,
“Melangkamoko nodo tadasi au membaro lao i bulu!”
2 Lawi tauna au kadake mopatakahe mata pananda
hai mopanahe tauna au manoto lalunda
hangko i kakaindiana.
3 Ane rara ngkatuwo au manoto magero,
apa mani pae au peisa rababehi tauna au manoto lalunda?
4 Pue maida i souNa au malelaha,
kadera kadatuaNa ara i suruga.
Ia mokamata manusia,
hai moparesa hinangka babehianda.
5 Pue mampetandaka tauna au manoto hai au kadake,
hai tauna au maseke Nakahihi.
6 Tauna au kadake ina Nahuku hai api,
belerang hai himburu au mepapumpu.
7 Lawi Puemi au manoto;
Ia mampokaahi tauna au manoto babehiana.
Tauna au bula laluna ina moisa Pue hai moita lenggeNa.