Pekakae i Pue Ala, Topebotusi au manoto
10
1 O Pue, moapari hai Nukaraohingkaihai mentabungiKo i tempoki masusa?
2 Anti pampemahilena, tauna au kadake mowulai liliu topeahi-ahi;
ia ina manawo anti dakena haduduana.
3 Tauna iti mohowara pea peundeana au kadake.
Tauna au mehioro mogane hai moaehe Pue.
4 Anti pampemahilena,
tauna au madosa bara mobila Pue Ala,
hai i pekirina, “Pue Ala bara ara.”
5 Tauna au kadake, tepabukei haha tunggaiana.
Ia bara moisa ba mampekiri hawana Pue,
hai iwalina napapakoihe.
6 Nauli laluna, “Iko maroho liliuna hai maroa katuwongku;
barana ina narumpa kapari hawe i pemuleangku.”
7 Ope-ope lolitanda, petunda-tunda, petatarahu hai pepopara,
dilanda buke akala hai dake.
8 Ia mentabungi i boea-boea
bona mopapate tauna au bara masala;
Ia moulamata tauna au manombe.
9 Ia nodo singa mandii-ndii i lalu lopo
mampendenga tauna au bara nasauru meewa.
Ia molawa tauna au malede,
nahaka hai nabisoso.
10 Ia moronggohu ina mehaka,
modungka tauna hai rohona.
11 Nauli laluna, “Barapi nakakatuinao Pue Ala.
Ia mentabungi hai barana hambela ina Naita.”
12 O Pue, pokalemide! Hukuhe tauna au kadake!
Nukatuinaohe tauna au mapari.
13 Moapari tauna au kadake mokakabosai liliu Pue Ala?
Moapari pane nauli laluna, “Barana ina nahuku Pue Ala.”
14 Agaiana Oio Pue Ala, moitahe,
Nuita mpuu kamasusanda hai kamaparinda,
Nutulungi liliuhe tauna au malede au mopaisarehe katuwonda Irio.
Anangkoi au ilu, Oiomi au motulungihe.
15 Tepomide kuasana tauna au kadake hai au meewa.
Huku liliuhe anti pebabehianda alana dakenda barapi Nulambi.
16 Pue moparenta liliu i hae-haena;
ope-ope tauna au bara moisa Pue ina tuna mponodohe i tampoNa.
17 Pue, Nupehadingi pekakaenda tauna au meahi-ahi
hai Nupakaroho lalunda.
18 Anangkoi au ilu hai tauna au mapari, Nuperuruihe i lalu katuwonda,
datipi ara tauna au mampopalangahe.