Pekakae kamatana anti pekampaina Pue
9
1 Idemi nanina Daudi au napahawe i tadulako toponani bona raponani moula nani Mut-Laben.
2 Hangko i kabulana lalungku, kupahawe kamatanangku i Pue
hai mobambarina hinangka au Nubabehi au mewulii.
3 Matanana hai monanina anti kaOiona,
hai motoiana hangaMu, O Pue Au Makuasa,
4 lawi iwalingku mousulihe,
hai madampahe alanda mate i lindoMu.
5 Nuperuruina hangko i kara-karangku,
lawi Oiomi topebotusi au manoto
au mohudaKo i wongko kadera kadatua.
6 Nuhukumohe ope-ope topenomba i anitu i humalele dunia,
hai Nuropuihe ope-ope tauna kadake;
Nugewomi hanganda
hawe i hae-haena.
7 Tunamohe iwalingki;
ope-ope boeanda Nugeromi;
barapi ara au mokakatuinao.
8 Pue moparenta i hae-haena;
hai mobotusi dunia hangko i kadera kadatuaNa au Nababehimi.
9 Ia ina moparenta dunia i kanoto-notoana,
hai ope-ope tauna ina Nabotusihe i katou-touana.
10 Pue iami pelangkaa tauna au mapari,
hai pengkatuwoa i tempo kamasusa.
11 O Pue, tauna au moisaKo meharunga Irio,
lawi tauna au menomba Irio bara Nukalambahi.
12 Toiami Pue au moparenta i Sion!
Nubambarimi ope-ope au Nababehi i humalele dunia.
13 Lawi Ia mohurungi tauna au mepapate,
hai tauna au mantodiha Nakatuinao,
peraroanda bara naliu inaoNa.
14 O Pue, pokaahina.
Peita kamaparingku, anti babehianda tauna au mokahihina.
O Pue, horemana hangko i baba kapate,
15 bona kutoiaKo, i lindonda to Yerusale,
hai pehoremaMu kupolinga i katana-tana.
16 Ope-ope tauna au baraKo moisa
manawohe i kalolu au rakae haduduanda;
kanahe hea au rataa sadudua.
17 Pue mopatongawami wataNa i pebotusiNa au manoto.
Tauna au kadake tehilu i babehiana haduduana.
18 Dunia kapate iami kahopoana tauna au kadake
hai ope-ope tauna i dunia au mopalehi Pue Ala.
19 Lawi tauna au meahi-ahi tuwonda bara ina rakalambahi liliu;
peharunganda tauna au mapari bara ina matanta.
20 O Pue, meangkamoKo; Nubotusihe ope-ope tauna i dunia,
hai manusia ineehe Nupogiangaa mampemahile.
21 O Pue, Nupogiangaamohe langa Irio,
bona raisa ihira iti manusia peahe.