Pekakae i Pue Ala, Topebotusi au manoto
7
1 Idemi peraroana Daudi au nananika i Pue kana i Kusi to Benami.
2 O Pue, Pue Ala au kupenombai, mentabungina Irio;
Nuperuruina hai Nuhoremana
hangko i ope-ope tauna au mowulaina.
3 Ineehe Nupogiangaa nodo singa mohakana hai rabisosona,
hai bara ara au mamperuruina.
4 O Pue Ala au kupenombai,
ane rapana mobabehina dake,
5 mopakanawona tauna au maroa pohintuwunda hai iko,
ba morugiina iwalingku au bara ara pongkana;
6 ane kubabehi nodo,
agingkumi rawulai hai rahakana iwalingku,
hai rapangka-pangka katuwongku duuna ratawu i lalu tampo.
7 O Pue, mearomoKo i lalu karumpuMu.
MeangkaKo molindo tauna au moeawana.
Nutulungina hai Nubotusi tauna moula kamanotoMu.
8 Nuguluhe ope-ope tauna i dunia motolelikiKo,
hai Nuparentahe hangko i kadatuaMu i suruga.
9 Oio moparesa ope-ope tauna.
Nupatongawami kamanotona lalungku,
lawi barana masala.
10 Nupopengkaroo dakenda tauna au mearoha,
hai Nupakaroho lalunda tauna au maroa,
lawi Oiomi Pue Ala au manoto
hai moparesa laluna hai pekirina tauna.
11 Labangku iami Pue Ala,
au mohorema tauna au manoto lalunda.
12 Pue Ala iami topebotusi au manoto,
hai pehukuNa i tauna au kadake bara mampilei tempo.
13 Ane bara tebali babehianda,
Pue Ala ina moaha pihoNa hai moumbu panaNa.
14 Ia ina mopasilolonga ewangaNa au mepapate
hai Napamawaa mata panaNa
15 Nipeita! Tauna au kadake
mokalaiaka peahe dake, hai mampopesupahe peakalangi.
16 Nodohe tauna au mokae kalolu bona nakanawoi tohaduana,
agaiana iatori haduduana au manawo i kalolu iti.
17 Mewali, ia rahuku anti dakena haduduana,
hai dakena iti morumpa ogu waana.
18 Kupahawe i Pue kamatanana lalungku, lawi Ia manoto;
kuoremi wamba pepomahile i Pue Au Makuasa.