Pekakae madondo
5
1 Idemi nanina Daudi au napahawe i tadulako toponani bona raponani hai tulali.
2 O Pue, pehadingi lolitangku,
Nuhaile peraroangku.
3 O Datungku, Pue Ala au kupenombai,
Nupehadingi pengkadedengku merapi tulungi Irio,
lawi Irio peana mekakae.
4 O Pue, madondo-dondo Nuhadimi peraroangku.
Mepulo-pulo mohuhumona popenombaku Irio,
hai kupepegia hanaina.
5 Lawi Oio, Pue Ala au bara mampokana dake,
tauna kadake bara ina peisa maida Irio.
6 Tauna au modoeki barahe ina mantaha i lindoMu;
Nukahihi ope-ope tauna
au mobabehi dake.
7 Nuropuihe tauna au raunde modongko;
Pue, marikaKo moita topeakalangi hai topepapate.
8 Agaiana anti ahiMu au bara mokahopoa,
ina mesuana i lalu souMu,
molingkuduna menomba molindo souMu au malelaha,
i lalu pengoruku Irio.
9 O Pue, bosa gagahe iwalingku!
Nuninina moula peundeaMu;
kalelahangi raraMu
au hangangaa kupolumaongi.
10 Lawi pololitanda iwalingku bara peisa rapoinalai;
Lalunda buke hai dake.
Kedai hai merikai lolitanda,
lolita mpebagiu mesupa i humenda.
11 O Pue Ala, hukuhe.
Palikangaahe marugi anti tunggaianda haduduanda.
Anti kangkaiana dosanda, Nuwuramohe,
lawi meewamohe Irio.
12 Kuperapi bona ope-ope tauna
au meonga Irio ina matana-tanahe,
hai monani liliuhe hawe i hae-haena.
Nukampaihe ope-ope tauna au mokabilaiKo
bona matana-tanahe anti kaOiona.
13 Lawi Oio mowati tauna au manoto O Pue,
Nukampaihe hai kamaahiMu nodo laba.