Datu au napilei Pue Ala
2
1 Moapari pane ope-ope ngamba mohiho-hihohe,hai tina-tina mampepekiri tunggaia au mbero-mbero?
2 Ope-ope datu hai tadulako i dunia
mopahintuwuhe pekirinda
moewa Pue hai datu au napilei Pue.
3 Mololitahe tadulako iti, rauli,
“Tabotukimi hinangka pehilunda irikita.
Hai ope-ope koloronda au rapopotakake tatendemi!”
4 Pue au moparenta hangko i suruga mengele,
Ia mokakabosai tunggaianda iti.
5 Mewali Pue mokambaroahe i lalu kamasodoNa,
Napatingkarahe i lalu karumpuNa au rumihi,
6 Nauli, “Ikomi au molanti datu au Kupilei i Sion,
bulu paidaaNgku au malelaha!”
7 Nauli datu, “Ina mampololitana apa au napakanotomi Pue;
Nauli Pue iriko node: ‘Oiomi anangKu!
Alo ide Kupoanamoko.’
8 Perapimide Iriko,
batena ope-ope ngamba ina Kuhuhu irio,
humalele dunia ina Kupopewali sosoramu.
9 Ihira ina nurupuhe hai lai besi,
nupihehe nodo kori tampo.”
10 Mewali, ikamu datu, moparentamokau hai kamatopa;
ikamu au makuasa i dunia, nidokomi pepaturo!
11 Menombamokau i Pue hai kalanga,
hai molingkudukau i bitiNa hai kawulunga,
12 dati hawe karumpuNa, hai unga peakau maropu i rara,
lawi karumpuNa holiga rore.
Morasimohe tauna au meonga i Pue!