To Yahudi raparentaihe moewa iwalinda
8
1 I alo iti peawomi, Datu Ahasiwero mowei ope-ope parewana Haman iwalinda to Yahudi, i Seteri, hai Mordekai mesua mampombelambia datu lawi napahawemi Seteri i datu pohalaluna hai Mordekai.2 Datu mowosuimi sisikalena au naala hulemi hangko i Haman hai nawei Mordekai, hai Seteri moangka Mordekai mewali au mokuasai hinangka parewana Haman.
3 Roo indo, Seteri lao mbuli mampombelambia datu. Ia molingkudu moteria hai merapi bona hinangka tunggaia kadake au nababehi Haman, pemuleana Agag, i to Yahudi nawoe datu.
4 Datu moulu lai bulawana i Seteri pane meangkami Seteri hai nauli,
5 “Ane napokana datu hai napokakaiana datu, maroa ane datu mampopesuwu hampaka parenta bona modii hule sura-surana Haman, anana Hamedata, pemuleana Agag, au ihina iami parenta mopapate ope-ope to Yahudi au ara i kadatua ide.
6 Bara turu inaongku moita hangka to Yahudingku hai ope-ope halalungku rapapate.”
7 Mololitami Datu Ahasiwero i Seteri hai Mordekai, nauli, “Tou mpuu, kuhawakami bona Haman ratoe lawi ia ina mopatunahe to Yahudi, hai hinangka parewana kuweimoko.
8 Agaiana, sura au teukimi i lalu hangana datu au rapenemi hai pene kadatua, bara peisa radii hule. Agaiana ikamu kupaliukau mouki sura kana i to Yahudi moula apa pea au maroa i peitami. Niukimi sura iti i lalu hangangku hai hangangaa nipene hai pene kadatua.”
9 Alo iti peawomi, iami alo karompulo hai talu, wula katalu, iami wula Siwan, Mordekai mokakio ope-ope guru tulisina datu naparentaihe bona moukihe sura hai rapakatu i to Yahudi, ope-ope gubernur, ope-ope bupati hai topoparenta mahile i hangatu rompulo hai pitu propinsi, mepongka i India hawe i Etiopia. Sura iti rauki moula basanda hai ukinda hambua-hambua propinsi. Ia mopakatu wori sura i to Yahudi moula basa hai ukinda to Yahudi.
10 Ope-ope sura iti natekengi Mordekai i lalu hangana Datu Ahasiwero au napene hai pene kadatua. Roo indo, Mordekai motuduhe tudua lao moanti ope-ope sura iti i hinangka propinsi kadatua hai mesawihe dara kadatua au magasi.
11 Ihina ope-ope sura iti iami: datu mopaliuhe to Yahudi i hinangka wanua bona moguluhe mampeparai watanda, ane rabungkahe tauna hangko i ngamba ntanina. Peisa worihe meewa hai mopapate topebungka iti hihimbela hai towawinenda hai ope-ope ananda. Ihira peisa worihe mopatuna iwalinda hai parewanda rapamuru.
12 Parenta iti hangangaa rapopolumao i hinangka kadatua Persia i alo au napakanotomi Haman ina mopapate to Yahudi iami alo kahampulo hai talu, wula kahampulo hai dua, iami wula Adar.
13 Sura parenta iti hangangaa rapopesuwu bona mewali hampaka atura au tepatokami hai hangangaa rapahawe i tauna au ara i ope-ope propinsi bona to Yahudi timamahe moewa iwalinda i alo au napakanotomi Haman.
14 Mewali, padu mpuumohe tudua iti mesawi dara kadatua. Sura parenta iti rapopesuwu i wanua Susan, rabasami parenta iti.
15 Roo indo, padumi Mordekai hangko i sou kadatua, mopake hampi kadatua au malelentoro hai bula, mekumba bana malelentoro mangura au maluha hai metali bulawa au makara ntepuu. Ope-ope tauna au ara i wanua Susan mogee-geemohe lawi matana lalunda.
16 To Yahudi au ara i wanua iti lenemi pekirinda, tindami lalunda. Maroami inaonda hai matana-tanamohe.
17 Nodo wori i ope-ope wanua hai ope-ope propinsi, iumba pea sura parenta datu iti rabasa, ope-opehe to Yahudi matana-tanahe hai mosusamohe. Mogalorihe tauna au indo au bara to Yahudi, bosamohe au meula i to Yahudi anti kalanganda.