Penanginda to Yahudi
9
1 Hawe mpuumi alo au tepatokami, iami alo kahampulo hai talu, wula kahampulo hai dua, wula Adar, iami alo au rapakanotomi ina mampopolumao hawana datu ina mopapatehe ope-ope to Yahudi. Alo itimi au rapepegia iwalinda to Yahudi au ina mokuasaihe. Agaiana tongawa to Yahudirahe au menangi.2 I hinangka wanua, mogulumohe ope-ope to Yahudi moewa tauna au kadake tunggaianda irihira. Tauna i ope-ope wanua langamohe irihira, hai bara huba hadua au pebai molindohe.
3 Hai topoparenta i ope-ope propinsi, ope-ope gubernur, bupati hai au mobagohe i kadatua morohongi to Yahudi, lawi langahe i Mordekai.
4 I humalele kadatua, raisami tauna Mordekai iti mahile mpuu kuasana au nawei datu.
5 Idomi hai ope-ope to Yahudi peisahe monangi iwalinda, mepapatehe, mepatunahe hai mobabehihe apa pea peundeanda i iwalinda.
6 I wanua Susan pea, to Yahudi mopapatemohe tauna lima atuna kabosanda.
7-10 I olonda au rapapate iti arahe hampulo tobalilo hanganda: Parsandata, Dalfon, Aspata, Porata, Adalya, Aridata, Parmasta, Arisai, Aridai hai Waisata. Ihira iti ananahe Haman, anana Hamedata, iwali mahilenda to Yahudi. Agaiana, to Yahudi barahe mopamuru parewanda iwalinda.
11 I alo iti pea womi, tauna lao mopahawe bambari i datu kangkaiana tauna au tepapate i wanua Susan.
12 Nauli datu i Seteri, “I wanua Susan pea, to Yahudi mopapatemohe tauna lima atuna kabosanda, tepesuahe anana Haman. Apa mani i ope-ope propinsi! Barapi kuisa ba apa au rababehi indo. Mewali, ide-ide apa mani au nuperapi? Nuulimi mai, manoto kaina kuweimu!”
13 Nahanai Seteri, “Ane maroa, i peitana datu, maroa ane to Yahudi au maida i wanua Susan ide kahalo madondo napaliumanihe datu mobabehi apa au rababehimi i alo ide. Hai ane maroa, ananahe Haman ratoehe i kau potoea tauna.”
14 Hangko indo, datu mampopesuwu mbuli parenta bona mampopolumaohe pamperapina Seteri. Sura parenta iti rapopesuwu i wanua Susan, hai ananahe Haman au hampulo ratoehe.
15 Mewali, i alo kahampulo hai iba, wula Adar, to Yahudi mogulu hulehe i wanua Susan hai mopapate mbulihe tauna talu atuna i wanua iti. Indo wori barahe mopamuru parewanda iwalinda.
16 To Yahudi au maidahe i hinangka propinsi mogulumohe mampeparai katuwonda. Ihira monangihe iwalinda hai mopapatehe pitu pulona hai lima sabuna tauna au mokahihihe, agaiana barahe mopamuru parewanda iwalinda.
17 Ope-ope iti mewali i alo kahampulo hai talu, wula Adar. Kahalona, i alo kahampulo hai iba, barahe mepapate, agaiana mopaarahe posusa kamatana.
18 Agaiana, to Yahudi au ara i wanua Susan mopaarahe posusa i alo kahampulo hai lima au mewali alo mahilenda, lawi mopapate manihe iwalinda i alo kahampulo hai iba, hai mengkaroohe i alo kahampulo hai lima.
19 Ido hai pane to Yahudi au maida i ope-ope wanua au kokoi mamposusaihe alo kahampulo hai iba, wula Adar au mewali alo kamatana-tananda hai momberora-rorahe.
Alo posusa Purim
20 Roo indo, Mordekai mouki hinangkana au mewali iti hai napakatu i ope-ope to Yahudi i humalele kadatuana Ahasiwero, maroa au hungku ba au karao.
21 Ihina sura iti mopakanoto bona i pare-parena hangangaa mamposusaihe alo kahampulo hai iba hai hampulo hai lima wula Adar.
22 Lawi i rongalo iti monangihe iwalinda, lawi kamasusa hai kapari lalu mewali kamatana. Idomi hai raposusai mahile mpuu alo iti, maande-andehe, momberorahe, hai mokira-kiramohe parewanda i tauna au meahi-ahi.
23 To Yahudi mampeulaihe parentana Mordekai. Nodomi posusa iti mewali adanda i pare-parena.
24 Haman anana Hamedata, pemuleana Agag, iwali mahilenda to Yahudi, roomi motende undi au rauli wori pur au mopakanoto alo popapatenda to Yahudi.
25 Agaiana kanapahawena Seteri i datu Ahasiwero tunggaiana Haman au kadake iti, napopesuwumi datu parenta au teuki bona apa au naliwoaka Haman au kadake, rapopewali i watana, idomi pane ia hai ananahe ratoe i kau petoea.
26 Idomi pane alo iti rauli Purim, alo karatendenami undi au mopatokami tempo kaina rapatunanda to Yahudi. Hintoto hai surana Mordekai hai apa au rahampeimi to Yahudi i tempo iti, 27 ido hai mobabehihe hampaka atura i watanda haduduanda, i anandahe hai i ope-ope tauna au ina mewali to Yahudi. I atura iti, pare-parena hangangaa mobabehihe posusa i alo au napakanotomi Mordekai.
28 Rapakanoto wori bona hawe i hae-haena alo-alo Purim hangangaa rabuhinao hai raposusaihe ope-ope to Yahudi iumba pea kaaranda.
29 Hihimbela hai surana Mordekai, Seteri anana Abihail mouki wori hambua sura au mopakaroho ihi surana Mordekai kana i alo posusa Purim iti.
30 Ope-ope sura iti rapakatu i ope-ope to Yahudi au maida i hangatu rompulo hai pitu propinsi au ara i kadatuana Ahasiwero. I lalu sura iti, teuki wori pekakae bona to Yahudi maroa katuwonda hai barahe moapa-apa.
31 I sura iti wori, rauki bona alo Purim raposusai to Yahudi hai pemuleanda i alo au tepatokami, nodo pambuhuinaonda tempo mopuasa hai tempo kamasusa lalu. Itimi ihi suranda Mordekai hai Seteri.
32 Parentana Seteri au mopatokami atura-atura Purim, teuki i hambua sura.