Haman rahuku mate.
7
1 Karombelanami datu hai Haman maande hai maenu hihimbela hai Seteri.2 Tanganda maenu anggoro, mololitami datu i Seteri nauli, “Ide-ide, nuulimi apa au nupeinao moula peundeamu! Kehapiri nuperapi hantanga hangko i kadatuangku, batena ina kuweiko.”
3 Nahanai Seteri, “Ane datu maahi iriko hai napokana datu, iko hai tinangkuhe peisa maningkai tuwo.
4 Lawi iko hai tinangkuhe, rapobalumongkai ina rapapate. Ane rapobalutongkai ina rapopewali hawi, kemandii-ndiito peana hai barana ina mosalempori datu. Agaiana ide-ide ikami ina rapapatengkai hai ina rapatunangkai.”
5 Mewali mekunemi Datu Ahasiwero i Seteri, towawinena, “Hema au pebai mobabehi nodo? Iumba taunana?”
6 Nahanai Seteri, nauli, “Haman au kadake idemi, iwalingki hai au ina mopapatengkai.” Mewali rumihi mpuu kalangana Haman i lindonda Datu Ahasiwero hai Seteri.
7 Kanahadina lolitana Seteri iti, rumihimi karumpuna datu hai liliu meangka mopalehi meja paandeana hai mesuwu lao i bonde bunga kadatua. Naisami Haman kaina nahukuna datu, ido hai ia roo-roo pearai indo hihimbela hai Seteri hai merapi bona naperurui Seteri.
8 Anti kalangana, Haman molingkudu hai motumpa i paturu-turuana Seteri hai merapi ampu. Tempo iti peawomi, datu mesule i lalu sou kadatua hangko i bonde bunga kadatua. Naita datu babehiana Haman nodo, mongangami, nauli, “Pebai mpuu woriko ina mosisilakai sambokongku i lindoku hai i lalu sou kadatuangku?”
Kahopona peami lolitana datu iti, au mobagohe i sou kadatua liliu laohe mohaka hai motolombungi waana Haman.
9 Hai mololitami Harbona, hadua hangko i olonda topobago i sou kadatua iti, nauli, “Datu, i hola souna Haman ara kau potoea tauna au kamapangkana rompulo hai romete. Petoea iti au nababehi Haman ina motoe Mordekai, tauna au mampelaemi katuwona datu hangkoia.”
Pane naparentaimohe datu, nauli, “Nitoemi Haman i kau petoea iti.”
10 Nodomi karahukuna Haman i petoea au nababehi haduduana au ina napotoengi Mordekai. Roo indo, hangko leneri karumpuna datu.