Datu mobila Mordekai
6
1 Kaindi iti datu bara peisa leta, ido hai naperapi bona raalaa sura poukia lolitakana ope-ope au mewali i kadatua, hai naperapi bona rabasaa.2 I lalu sura iti telambi uki kana i Mordekai au hangkoia mampogilumohe Bigtan hai Teres kana i poliwoakanda ina mopapate datu. Tauna au rodua iti iamohe topekampai i baba lincu paturuana datu.
3 Napekune datu, nauli, “Pebila apami au rawei i Mordekai iti?” Rahanaimi topobagona rauli, “Bara mani ara au rawei iria.”
4 Mekune mbuli datu nauli, “Hema topobagongku au ara i sou kadatua ide-ide?” Tempo ido Haman hangko mesua i tabangaa sou kadatua, ina mesabi i datu bona motoe Mordekai i kau petoea au rababehimi iti.
5 Mehanahe topobagona iti, rauli, “Ide-ide Haman ara i sou kadatua ide hai ina mai mampombelambia datu.” Nauli datu, “Tudu mai mesua!”
6 Mesuami Haman, mololitami datu iria, nauli, “Mewali node, ara hadua tauna au ina kuwei pebila au mahile. Apami au maroa ina kuwei iria?”
Pekirina Haman node, “Hema ntani mani pae au ina nawei datu pebila au mahile? Batena pea iko!”
7-8 Ido hai nahanai Haman node, “Tauna iti hangangaa rawarui hampi kadatua au paka napake datu hai hangangaa mampesawii darana datu au rapakea songko kadatua bona raisa tauna bosa itimi darana datu.
9 Hai hadua tauna au mapangka lantina au ara i lalu kadatua au hangangaa mohampii tauna au ina nabila datu iti, hai moioru modii dara au napodara tauna au ina nabila datu molumao i tanga wanua. Tauna au mapangka lantina iti hangangaa molumao ioru hai mololita napakekebuu nauli, ‘Nodemi rarana datu mowei pebila i tauna au nabila!’ ”
10 Mololitami datu i Haman nauli, “Holigamoko lao moala hampi kadatua hai darangku hai ope-ope iti nuwei Mordekai to Yahudi iti. Hangangaa nubabehi nodo au nuuli inona, inee ara au makura nauri hampaka. Ia ide-ide peisa nupohidupaa tangana mohuda-huda i babaka sou kadatua.”
11 Roo indo, lao mpuumi Haman moala hampi kadatua hai darana datu hai mowaruimi Mordekai hampi kadatua. Mesawimi Mordekai i dara, hai nadiimi Haman molumao i tanga wanua hai mololita kekebuu nauli, “Peita, nodemi rarana datu mowei pebila i tauna au nabila!”
12 Roo indo, mesulemi Mordekai i babaka sou kadatua. Agaiana Haman mesule hoholiga i souna, lawi masusa laluna, hai maeami raita tauna. Ido hai natabungimi lindona.
13 Kahawena i souna, napololita i towawinena hai i himadanahe kana apa au mewali iria. Roo indo, towawinena hai himadanahe au mapande, mololitahe iria, rauli, “Ide-ide mepongkamoko manangi hangko i Mordekai, to Yahudi iti. Anti katoYahudina ia barapi peisa ina nuewa, hai manotomi kamanangimu.”
14 Tanganda mani molololita hai Haman, hawemohe topobago i kadatua au ina laohe moanti Haman i posusa paande sambela au nababehi Seteri.