Seteri lao mampombelambia datu
5
1 I kataluna alona popuasanda, Seteri mopakemi hampi kadatua, pane lao i tabangaa sou kadatua hai meangka i lindo baba pogomboa. Tempo iti datu tangana mohuda i pohudaa kadatua melindo i baba iti.2 I kamoitana peami Seteri meangka i raoa, hawemi ahi laluna, ido hai nauluami lai bulawa au ara i taiena. Mengkahungkumi Seteri lao motobo wuntu lai iti.
3 Mekunemi datu iria, nauli, “Seteri, sambokongku, apari tunggaiamu hai apa peundeamu? Nuulimi! Kehapiri nuperapi hantanga hangko i kadatuangku ide, batena kuweiko.”
4 Nahanai Seteri, “Ane napokana datu, ane maroa datu hai Haman mai i posusaa au kupaaraa datu i paidaangku.”
5 Datu mokakio mai Haman holiga bona laohe mopabukei pekakiona Seteri. Lao mpuumohe i posusa au nababehi Seteri iti.
6 Tanganda maenu anggoro, mekunemi datu, “Ide-ide, nuulimi apa peundeamu. Apa pea au nuperapi ina kuweiko, kehapiri hantanga hangko i kadatuangku batena kupabukei.”
7 Mehana Seteri, nauli, “Pamperapiku hai peundeaku iami: 8 Ane datu maahi iriko hai mampokana mopabukei pamperapiku hai peundeaku ide, kuperapi bona datu hai Haman mai mani i posusa au kubabehi kahalo indo rai hangko kupahaweri peundeaku i datu.”
Haman moliwoaka Mordekai napapate
9 I pesulena Haman hangko i posusa au nababehi Seteri, matana mpuu laluna. Agaiana tempona melempo i babaka sou kadatua, naitari Mordekai bara mau meangka hai bara mebila iria, mewali rumihimi karumpuna.
10 Agaiana karumpuna iti nataha pea hai mesule i souna. Kahawena i souna, nakakiohe himadana hai nakakio wori towawinena au rahanga Zeres bona mohuda-huda sambelahe.
11 Mewali, napepongkami Haman mampololita kapebukuna, kangkaiana anana tobalilo, kamapangkana lantina au nawei datu iria hai kamapangkana lantina hangko i ope-ope au ara lantinda i kadatua.
12 Nauli wori, “Mogalori Seteri, iko pea hai datu au nakakio lao maande sambela i posusa au napaara i paidaana hai kahalo kaindi nakakio mbulingkai lao maande.
13 Agaiana ope-ope iti bara ara bunduna ane kuita mani Mordekai to Yahudi iti mohuda i babaka kadatua.”
14 Karahadina lolitana iti, towawinena hai ope-ope himadana mololitamohe iria, rauli, “Nutudumi tauna mobabehi kau potoea tauna au kapangkana rompulo hai romete. Hai kahalo madondo-dondo laomoko nupesabia i datu bona Mordekai ratoe indo. Ane roomi nubabehi nodo, hangko tindari lalumu ane laoko hai datu i posusa paande sambela au napaara Seteri.” Ope-ope au rauli himadana hai towawinena napokana Haman, ido hai natudumohe tauna hoholiga mobabehi kau potoea iti.