Mordekai merapi tulungi i Seteri
4
1 Kanahadina Mordekai apa au mewali iti, mohepami waruna hai mampohampimi waru ngkasusa hai moawui waana anti kamasusana laluna. Roo indo, lao i lalu wanua moteteria.2 Mordekai mengkaroo i lindo babaka sou kadatua, lawi tauna au mehampi waru ngkasusa bara peisa mesua i lalu kadatua.
3 Nodo wori i ope-ope propinsi, karahadina peami to Yahudi parentana datu au rapahawe, mopuasamohe hai moteteriahe. I olonda, bosahe au mehampi waru ngkasusa hai maturuhe i awu.
4 I temponda anantowawine au mokadipura Seteri hai ope-ope topekadipurana mopahawe apa au nababehi Mordekai, wiora mpuumi laluna Seteri. Ido hai, pane mopakatumi hampi hawe i Mordekai bona hampi iti napopopahurungi waru ngkasusa au napake, agaiana bara napeulai Mordekai.
5 Roo indo, Seteri mokakio Hatah, hadua au napoinalaimi datu mokadipura Seteri. Natudumi lao i Mordekai mampekune apa au mewali hai moapari pane nababehi nodo.
6 Pane lao mpuumi Hatah mampohidupaa Mordekai i tanalapa wanua au ara i lindo babaka sou kadatua.
7 Natuntumi Mordekai iria apa au mewali hai hangkia kangkaiana doi pera au nadandi Haman ina rapusa i lalu pambolia anu-anuna datu bona mopatunahe ope-ope to Yahudi.
8 Nodo wori surana datu au napopesuwu i wanua Susan, au ihina iami parenta bona ope-ope to Yahudi rapapate, nawei Hatah bona natudungia Seteri hai mampololita apa au mewali. Naperapi bona Seteri lao i datu merapi to Yahudi barahe rapapate.
9 Roo indo, mesulemi Hatah lao i Seteri mopahawe tewai au hangko i Mordekai.
10 Agaiana, Seteri motudu huleri Hatah lao i Mordekai mopahawe tewai au manguli,
11 “Ope-ope tauna maroa tobalilo ba towawine au barahe rakakio hai mampombelambia datu i paidaa pampohidupaana torare, hangangaa rahuku matehe. I tauna au naulua pea datu lai bulawa au bara rahuku. Idomi atura au raisa ope-ope tauna au ara i kadatua. Agaiana iko, hambulami barana hambela nakakio datu.”
12 Roo ido, rapahawe mpuumi tewaina Seteri i Mordekai.
13 Pane Mordekai mopakatu huleri pepopaingana i Seteri au manguli, “Inee nupehangu anti kamaidamu i lalu sou kadatua barapoko ina rapopoapa nodohe to Yahudi au ntanina.
14 Lawi nauri mandii-ndii peako ide-ide, batena pea ara tauna ntanina au ina motulungi hai mokabaha to Yahudi. Agaiana oio hai halalumuhe batemi rapapate. Mole babila idomi tunggaiana pane tepileiko mewali towawinena datu.”
15 Mewali Seteri mopakatu pehanana i Mordekai, nauli,
16 “Nugulumohe ope-ope to Yahudi au ara i Susan bona rapekakaengana. Ineekau maande hai maenu talu alona talu wengina kamahaena. Iko hai anantowawine topobagongkuhe ina mopuasa woringkai. Roo indo, iko ina laona mampombelambia datu, lawi ane hangangaa matena anti kadangku moula atura, bara moapa.”
17 Mewali, padu mpuumi Mordekai hai nababehimi ope-ope tewaina Seteri iria.