Haman motunggai to Yahudi napapate
3
1 Bahangkia tempona liu, Datu Ahasiwero moangka hadua tauna au rahanga Haman anana Hamedata, pemuleana Datu Agag.2 Datu moparentaihe ope-ope topobagona i kadatuana bona moadaihe Haman hai molingkuduhe meampu iria, lawi nodomi parentana datu. Ope-ope tauna i kadatua mampeulaihe parentana datu, agaiana ara hadua tauna au bara mampeulai parenta iti iami Mordekai.
3 Topobagonahe datu au i baba kadatua, au ntanina mekunehe iria, rauli, “Moapari hai barako mampeulai parentana datu?”
4 Alo-alona mopari-parihe Mordekai bona mampeulai parentana datu, agaiana batena pea bara napeulai. Nauliri, “Iko to Yahudina; barana peisa mampenombai tauna.” Hangko indo, rapahaweami Haman lolitana Mordekai iti, lawi rapeinao moisa apa au ina nababehi Haman i Mordekai.
5 Kanaisanami Haman, Mordekai bara mau molingkudu i lindona, rumihi mpuu karumpuna.
6 Hai rauliangaa wori Haman, Mordekai iti iami hadua to Yahudi. Mewali, pekirina Haman, ane Mordekai pea au napapate, bara mani handa. Aginami ope-opehe to Yahudi au ara i humalele kadatua Persia rapapate.
7 I kahampulona hai rompare poparentana Datu Ahasiwero, i wula kaisa iami wula Nisan, Haman motuduhe tauna motende dadu au rauli pur. Iti rababehi bona moisahe i alo hai i wula apa maroa mampopewali tunggaiana au kadake iti. Pane rapakanotomi i wula kahampulo hai dua, iami wula Adar.
8 Mewali, laomi Haman i datu hai mololita, nauli, “Datu au kubila, arahe tohantina au mahawuhe maida i humalele kadatuamu, adanda montani hai adanda ope-ope tina au ara i kadatuamu hai barahe mau mampeulai atura-aturana datu. Mewali, ane maroa nauliangaahe datu bona inee peahe mampeulai peundeanda haduduanda.
9 Ane napokana datu, rababehimi hambua sura parenta bona tauna au bara mampeulai atura iti hangangaa rapapate. Ane napokana datu lolitangku ide, peisana mampopesua talu atuna iba pulona sabuna kilo doi pera i pambolia anu-anuna datu.”
10 Kanahadina nodo, nawosuimi datu sisikalena hangko i karawena bona rapopopene sura parenta hai nahuhua Haman anana Hamedata pemuleana Agag, iwali mahilenda to Yahudi iti.
11 Nauli datu i Haman, “Tina itihe hai doi au ina nuweina kuhuhu peami irio. Hai nubabehimi apa au hintoto hai peundeamu.”
12 Mewali i alo hampulo hai talu i wula kaisa, Haman mokakiohe guru tulisina datu, hai natuduhe mouki hinangka au naparentaiahe. Sura iti rauki hai rapakatu i ope-ope tauna au mokamumuhe tampo i ope-ope tadulako ngamba moula basanda haduduanda. Sura iti rauki i lalu hangana Datu Ahasiwero au rapene hai sisikalena datu.
13 Hai rapakatu holiga i hinangka ngamba kadatua. Sura iti ihina node, “I alo hampulo hai talu, wula kahampulo hai dua, iami wula Adar, ope-opehe to Yahudi hangangaa nipapatehe. Maroa tosae hai au mangura, maroa towawine hai anangkoi hangangaa nipapatehe ope-ope i alo iti hai nirampaki parewanda.”
14 Parenta iti hangangaa rapahawe i ope-ope propinsi bona ope-ope tauna masilolongahe i alo au tapatokami iti.
15 Mewali, hoholigamohe padu tudua au magasi iti lao moanti sura i humalele ngamba kadatua. Atura datu iti napopesuwu i bente Susan, pohudaa poparenta kadatua Persia. Tangana nodo, datu hai Haman mohuda-hudahe maenu anggoro, agaiana tauna bosa i Susan, wulungahe anti pohadinda bambari iti.