Seteri raangka mewali towawinena datu
2
1 Bahangkiami tempona liu, opemi karumpuna Datu Ahasiwero, agaiana ia mampekiri liliu mani babehiana Wasti, towawinena, hai au nabotusimi.2 Pane mololitamohe topekadipurana au napoinalai, rauli, “Datu hangangaa rahaokia anantowawine au makara.
3 Hai hangangaa moangka topobagona au makuasahe i propinsi-propinsi i kadatua ide bona moguluhe anantowawine au makara hai raanti i sou kadatua towawine i wanua Susan. Inditi ara Hegai topobagona datu au tokami mourusi mampopengaa au peisa mopamakarahe anantowawine.
4 Mewali anantowawine au makara ntepuu i peitana datu, iami au mewali towawinena, mopahuru Wasti.” Lolita iti napokanami datu hai nababehimi nodo.
5 Tempo iti i wanua Susan, ara hadua to Yahudi au rahanga Mordekai, anana Yair, pemuleana Simei anana Kis hangko i tina Benami.
6 Mordekai iti ratawani i tempona Yerusale nanangi Nebukadnesar datu Babeli. Mordekai raanti i Babeli hihimbela hai Yoyakin, datu Yehuda, hai ope-ope tawani au ntanina.
7 Mordekai iti ana mohalalu hai anantowawine au rahanga Seteri. Seteri hanga Ibaranina iami Hadasa. Seteri iami hadua anantowawine au makara. Seteri barapi motosae, ido hai napowata anami Mordekai hai nakadipura hangko kokoi.
8 Karoona peami parentana datu rapahawe i humalele kadatuana, bosa mpuuhe anantowawine au laohe raanti i wanua Susan, hai Seteri ara worimi i olonda. Ihira rapopaidahe i sou kadatua towawine, hai nakampaihe Hegai, topokadipuranahe towawinena datu.
9 Hegai iti rumihi kamampomakarana Seteri hai napokakaia. Ido hai Seteri iti hangangaa napupurui bona makara ntepuu hai nakadipura maroa, nodo wori paandena nakadipura maroa-roa. Mewali, anti karapomahilena, Seteri ralimbanga i paidaa au maroa ntepuu, iami i lalu sou kadatua hai ratuduhe pitu anantowawine mokadipura.
10 Anti pepaturona Mordekai, Seteri mowuniangi katoYahudina.
11 Alo-alona Mordekai molulumao i tabangaa sou kadatua towawine bona naisa apa au mewali i Seteri.
12 Ope-opehe anantowawine iti rakadipura hampulo hai rombula kamahaena. Ini wulana rapamawongihe hai lana au ragalo mire hai ini wori wulana rapamawongihe hai rampa-rampa ntanina bona makara ntepuuhe. Roo nodo, hadua-haduahe lao mampombelambia Datu Ahasiwero.
13 I kalaonda mampombelambia datu, peisahe mamperapi apa pea au ara i paidaanda iti bona naanti lao molindo datu i sou kadatuana.
14 Anantowawine au ina mampombelambia datu lao raanti kalumba hai rapopesule madondo, agaiana rapopaidami i sou kadatua towawine au haoguna. Sou kadatua iti, nakampai Saasgas topobagona datu au mokadipurahe towawinena datu. Anantowawine iti barapi rapaliu mesua lao mampombelambia datu, agaiana ane naunde datu hangko napopekakiori hai nauli hangana.
15 Hawemi tempona Seteri lao mampohidupaa datu. Seteri iami anana Abihail halaluna umana Mordekai. Seteri iti bara mampeinao apa-apa, batenami au napaturoami Hegai, au mokadipura towawinenahe datu i sou kadatua towawine. Hema pea au moita, batena mampokakaiahe Seteri.
16 I pare kapitu wula kahampulo poparentana Ahasiwero, iami wula Tebet, Seteri raanti lao mampombelambia Datu Ahasiwero i sou kadatuana.
17 Seteri melumbu kanapokakaiana datu hangko i anantowawine au ntanina. Idomi hai datu mopataka tali kadatua i waana Seteri hai napopewalimi towawinena mopahuru Wasti.
18 Roo indo, Datu Ahasiwero mopaara susa pampomahilena Seteri, hai mokakiohe ope-ope topobagona au mapangka lantinda. Ia mopahawe Alo Pengkarooangaa mobago i kadatua hai mokira-kira parasee au ngkaia.
Mordekai mopahawe kaina rapapatena datu
19 Tempo iti, Mordekai naangkami datu mewali topobago i sou kadatuana.
20 Seteri bara hambela mopatongawa katoYahudina, lawi bara napaliu Mordekai. Seteri mengkoru i Mordekai nodo i kaanangkoina mani.
21 Hambela tempo, tangana Mordekai mobago i kadatua, ara rodua topobagona datu, iami Bigtan hai Teres moliwoakahe Datu Ahasiwero rapapate lawi rumihi karakahihina.
22 Apa au ratunggai iti naisa Mordekai hai liliu lao napahawe i Seteri. Kanahadina peami Seteri lolita iti, barapi napegia mahae-hae, liliu napahawe i Datu Ahasiwero.
23 Kara-kara iti napetampa datu hai tongawa mpuu katouna. Tauna au rodua iti ratoehe moula parentana datu. Kara-kara iti rauki i hambua sura tuntukana i lindona datu.