Seteri
Wasti moewa parentana Datu Ahasiwero
1
1 I tempona Datu Ahasiwero moparenta hangatu rompulo hai pitu propinsi mepongka i India hawe i Etiopia, 2 pohudaa kadatuana ara i lalu wanua Susan i Persia.3 I kataluna parena poparentana, datu mopaara posusa hai mokakiohe ope-ope au mapangka lantinda hai topobagonahe. Surodado Persia hai Media, tuana hai au mapangka lantinda i hambua tampo, hawehe i lindona datu.
4 I tanga posusa iti, datu mampetudungia hinangka anu-anuna au makara hai masuli haha holona bona ope-ope tauna moisa kaianami datu au meawa hai mahile. Posusa iti napaara datu ini wulana kamahaena.
5 Hopomi ini wulana posusa iti, datu mopaara mbuli posusa ntanina pitu alona kamahaena hai mokakiohe ope-ope tauna au ara i lalu bente Susan, hangko i tauna au pebuku hawe-hawe i tauna au meahi-ahi. Posusa iti rababehi i bonde bunga i lindo sou kadatua.
6 Tabangaa sou kadatua iti rabungai hai bana lena maalusu au malentoro hai bula, raboke bana lena maalusu au malelentoro hai rahoda i kala-kala salaka au tepataka i arii watu bula. Pohudaa au rababehi hangko i bulawa hai salaka rawoli i lanta makara au rababehi hangko i iba pakana watu, iami watu bula, watu ake, koli mutiara hai watu malewau.
7 Datu mopaara anggoro au ngkaia ntepuu hai rakando i mangko-mangko bulawa au montani-ntani lenggena.
8 Ope-ope torare peisahe maenu hintoto hai peundeanda, lawi nodomi parentana datu i toperoranahe.
9 Nodo wori Wasti, sambokona datu, mopaara wori posusa hai ope-ope towawine au ara i lalu sou kadatua.
10 I alo kapitu posusa iti, tempona datu matana laluna lawi maenumi anggoro, nakakiomohe topobagona au pitu au napatokamohe mobago iria, iamohe: Mehuman, Bista, Harbona, Bigta, Abagta, Setar hai Karkas.
11 Topobagona iti, natuduhe mai moanti Wasti, sambokona hai mopake mai tali kadatua lao mampombelambia datu, hai mampetudungia kamakarana i ope-ope tauna au mapangka lantinda, lawi sambokona iti makara mpuu lenggena.
12 Agaiana Wasti, sambokona datu, bara moula pekakiona datu au rapahawehe topobagona iti, ido hai rumihimi karumpuna datu.
13 Mewali mekunemi datu i tauna au mapande au moisahe atura, lawi ane ara au napomapari pekiri datu, hangangaa napahawe i topoisahe atura-atura.
14 Tauna au hungkuhe i datu iamohe: Karsena, Setar, Admata, Tarsis, Meres, Marsena hai Memukan. Ihirami au napoinalai ntepuu datu mewali topepaturona hai ihirami au mapangka lantinda i kadatua iti. Mekune datu irihira, nauli,
15 “Moula atura kadatua, apa au hangangaa rababehi i Wasti, lawi bara mampeulai pekakiongku au rapahawea topobagongku?”
16 Mewali, mololitami Memukan i datu hai i au mapangka lantina iti, nauli, “Wasti, towawinena datu, bara pea masala i datu, agaiana masala wori i ope-ope au mapangka lantinda, hai i ope-ope tauna au i lalu kadatuana Datu Ahasiwero, 17 lawi babehiana iti, ina molelehi ope-ope towawine, alana barapohe moadai tobalilonda, lawi ane rapopololita tauna, rauli node: Datu Ahasiwero mokakio Wasti, towawinena bona lao iria, agaiana bara mau lao.
18 I alo ide peawomi towawinendahe au mapangka lantinda i kadatua Persia hai Media ane mohadihe babehiana Wasti towawinena datu, ina rapahawe i tobalilonda, alana pepapakoi hai pepokarumpu bara polo liu.
19 Ane maroa i peitana datu, hangangaa rapopesuwu hampaka parentana datu i kadatua, hai hangangaa rauki i lalu atura-atura kadatua Persia hai Media alana bara peisa radii hule, bona Wasti barapi peisa lao mampombelambia Datu Ahasiwero. Roo indo, datu hangangaa mopilei hadua towawine ntanina au hintoto mopahuru Wasti mewali towawinena datu.
20 Ane atura au nabotusimi datu iti tepahawemi i kadatua au maemba ide, ope-ope towawine ina mobilahe tobalilonda, mepongka i to mapangka lantinda hawe i tauna bosa.”
21 Pololitana Memukan iti napokana maroa Datu Ahasiwero hai au mapangka lantinda, mewali nababehimi Datu Ahasiwero hintoto hai apa au nauli Memukan iti.
22 Hangko indo, napakatumi Datu Ahasiwero sura-sura iti i humalele kadatua moula ukina hambua-hambua propinsi hai i paka-pakana basa moula basanda au manguli, “Ope-ope tobalilo hangangaa mewali tadulako i lalu sounda hai peisahe mololita i basanda haduduanda.”