Atura moaro Bambaru Malelaha hai popenomba i Pue
25
1 Mongkorami Pue i Musa, Nauli, 2 “Nuuliangaahe to Isaraeli bona moantihe popenombanda Iriko. Hema au tekalea lalunda, hangangaa moanti popenombanda, 3 iami: bulawa, salaka hai tambaga; 4 lero malewau, malentoro hai malei, lena maalusu, bana hangko i wulu towau, 5 koli dimba laki au rawone malei, koli binata au maluha, kau akasia, 6 mina au rapopoihii hulo, rampa-rampa popetawi hai dupa au mawongi, 7 mampopengaa watu paramata au ina rapataka i badu efod hai petabungi ponda. 8 Hai nutuduhe mobabehi bambaru au malelaha bona maidaNa i olonda. 9 Bambaru hai hinangka parewana hangangaa rababehi hintoto hai apa au ina Kupatuntukaako.”Peti pambolia hawa hampulo
10 Hai nutudu worihe mobabehi haogu peti hangko i kau akasia au kangkalangana hamete hampulo senti; kapekana hai kapangkana ini pulona hai ini senti. 11 I raoana hai i laluna, hangangaa ralapisi bulawa ntepuu hai ratalawiwingi wori bulawa. 12 Nubabehi kala bulawa iba oguna, hai nupataka i tumpipina roogu-roogu hambali. 13 Nubabehi wori popekowa hangko i kau akasia, hai nulapisi bulawa. 14 Hai popekowa iti nuhohoka i kala bulawa au nupataka i tumpipina bona peti podandi peisa rakowa. 15 Kau popekowana iti inee mpuu raingihi hangko i kala bulawa. 16 I lalu peti podandi iti, hangangaa nuwoli watu poukia hawa hampulo au ina Kuweiko.
17 Petaukia Podame iti, hangangaa nubabehi hangko i bulawa ntepuu au kangkalangana hangatu hampulo senti hai kapekana ini pulona hai ini senti. 18-19 Hangangaa nutampolo rombua Kerubb hangko i bulawa, hambua i wuntuna hambali hai hambua i wuntu hambalina. 20 Rombua Kerub iti rapopombelindohe, mobinihihe kapinda motabungi petauki iti hai rapopotumpahe. 21 Roo nodo, nuwolimi roogu watu poukia hawa hampulo i lalu peti iti hai nutaukimi. 22 Inditimi Iko hai oio ina mohidupa, hai hangko i wongko petauki iti i olonda kerub i wongko peti podandi, ina mololitaNa irio kana i hinangka atura-aturaNgku au ina nupahaweahe to Isaraeli.
Meja pambolia roti popenomba
23 Hangangaa nubabehi haogu meja hangko i kau akasia au kangkalangana ualu pulona hai ualu senti, kapekana iba pulona hai iba senti. Hai kapangkana ini pulona hai ini senti. 24 Meja iti nulapisi bulawa ntepuu hai nubabehi wori talawiwina mantoleli hangko i bulawa ntepuu. 25 Mantoleli wiwi meja iti ntanda i woi, nupatai pitu hantanga senti kapekana au nulapisi bulawa ntepuu hai nutalawiwingi wori mantoleli hangko i bulawa ntepuu. 26 Nubabehi iba oguna kala bulawa, hai nupataka i huno-hunona i bitina. 27 Kala bulawa iti hangangaa nupataka hungku i talawiwina, lawi ina rapohohokai kau popekowa bona peisa rakowa. 28 Nubabehi kau popekowana hangko i kau akasia, hai nulapisi bulawa bona meja iti peisa rakowa. 29 Hangangaa mobabehiko parewa meja iti hangko i bulawa ntepuu iami, tabo hai baki nodo wori bokoro hai mangko au rapake ane mohuhu popenomba anggoro. 30 Roti popenomba hangangaa tepasilolonga liliu i wongko meja iti i lindoKu.
Biti hulo
31 Hangko i hantepo bulawa ntepuu, hangangaa nutampolo biti hulo, maroa popabusaana, pekingkiana, bungana, wuntuna hai kalopana. 32 I pekingkiana, hangangaa rababehi ini pengana, hambali-hambali talu pengana. 33 I penga-pengana, hangangaa rababehi talu mbuana bunga au nodo bunga badam tepesua wuntuna hai kalopana. 34 I pekingkia biti hulo iti, hangangaa rababehi iba mbuana bungana au nodo bunga badam hai wuntuna hai kalopana. 35 I woi penga-pengana, hangangaa rababehi hambua kalopana. 36 Biti hulo iti, penga-pengana hai bungana, hangangaa rababehi hangko i hantepo bulawa ntepuu. 37 Hangangaa nubabehi hulo pitu oguna, hai nuwolihe i wuntu biti hulo, hai nuhuwe bona mopamabaa paidaa i lindona. 38 Hupina hai dulana hangangaa nubabehi hangko i bulawa ntepuu. 39 Bulawa ntepuu au nubabehi biti hulo hai hinangka parewana hangangaa talu pulona hai lima kilo. 40 Nukatuinao bona i tempomu mobabehi biti hulo iti hai hinangka parewana, hangangaa nubabehi nodo au Kutudungiamoko i Bulu Sinai.