Bambaru Malelaha
26
1 “Nubabehi Bambaru Malelaha hangko i hampulo tauna bana lena maalusu hai makumba au ratanu hangko i lero malewau, malentoro hai malei hai rasuji kerub. 2 Kangkalangana hantau-hantau bana iti hangangaa hampulo hai romete hai kapekana romete. 3 Lima tauna bana hangangaa radalo mewali hantau, nodo wori au lima tauna radalo mewali hantau. 4 Rontau bana iti nubabehi kalamatana hangko i bana malewau i wiwina hambali, 5 hantau-hantau lima pulona mbuana au nupahintoto bona peisa raumpu. 6 Hai hangangaa nubabehi popekaina lima pulona mbuana hangko i bulawa bona bana iti peisa rapopombedai.7 Nubabehi wori hampulo hai hantau bana hangko i wulu towau bona napoatu Bambaru Malelaha iti. 8 Kangkalangana hantau-hantau bana iti hampulo hai talu mete hai kapekana romete. 9 Lima tauna hangangaa radalo mewali hantau hai au ini tauna radalo ntani. Umpuna kaini hangangaa ralupi rombua bona napotambire. 10 I wiwina hambali rontau bana iti hangangaa nukalamatai lima pulona mbuana. 11 Hai nubabehi popekaina hangko i tambaga lima pulona mbuana hai nukaika i kalamatana bona bana iti tedai mewali hantau. 12 Bana au melabi ntanda i taleu motabungi taleu Bambaru Malelaha. 13 Bana au melabi lima-lima pulona senti kapekana pontimali rapalikangaa motabungi tumpipi Bambaru Malelaha iti.
14 Nubabehi wori rombua pebobongi bambaru iti ntanda i raoa, hambua hangko i koli dimba laki au rawone malei hai hambua hangko i koli binata au maluha ntanda i wongko.
15 Bambaru iti nubabehi rangkana au meangka hangko i kau akasia. 16 Kangkalangana iba mete; kapekana ini pulona hai ini senti. 17 Hambua rangka ara rombua dilana bona peisa rapopombedai, ope-ope rangka iti nodo haha kanubabehina. 18 Ntanda i kalimpaana hangangaa rompulo mbuana rangkana, 19 hai nubabehi popabusaa rangka iti iba pulona mbuana au hangko i salaka, hambua rangka rombua popabusaana. 20 I tumpipina ntanda i Raa hangangaa rompulo wori rangkana, 21 hai popabusaana iba wori pulona mbuana hangko i salaka.
22 I taleuna ntanda i Katampua alo, nubabehi ini mbuana rangkana. 23 Hai nubabehi rombua rangka i huno-hunona ntanda i taleu. 24 Rangka au i huno-hunona iti hangangaa radai i woi hai i wongko hungku i kalamatana. 25 Mewali rangkana ualu mbuana hai popabusaana au hangko i salaka hampulo hai ini mbuana.
26 Nubabehi tuwewena hampulo hai lima kauna hangko i kau akasia, lima kauna nupataka i tumpipina hambali, 27 lima kauna i tumpipina au hambalina, hai au lima mani kauna nupataka i taleuna ntanda i Katampua alo. 28 Hai tuwewena au i tanga-tanga, hangangaa nupataka hangko i wuntuna hopo-hopo i wuntuna hambali. 29 Ope-ope rangka hai tuwewena hangangaa nulapisi hai bulawa. Nodo wori ope-ope kala au rapohohokai tuwewena hangangaa hangko i bulawa. 30 Nuaromi Bambaru Malelaha iti hintoto hai au Kutudungiamoko i bulu Sinai.
31 Nubabehi rindi bana hangko i bana lena maalusu hai makumba au ratanu hangko i lero malewau, malentoro hai malei hai rasuji kerub. 32 Rindi bana iti nutoe hai popekai hangko i bulawa i iba mbuana arii hangko i kau akasia au ralapisi bulawa hai rapabusa i wongko iba mbuana popabusaa hangko i salaka. 33 Hai rindi bana iti, nupatoko i woi podaia atu Bambaru Malelaha iti. Peti podandi au rapambolii watu poukia hawa hampulo nuwoli i taleu rindi bana iti bona moparioloki Hologa Malelaha hai Hologa au Malelaha Ntepuu. 34 Peti podandi iti nuwoli i lalu Hologa au Malelaha Ntepuu. 35 Meja pambolia roti hangangaa nuwoli i raoa hologa au malelaha ntepuu ntanda i Raa hai biti hulo nuwoli ntanda i Raa i lalu Bambaru Malelaha iti.
36 Hai hangangaa nubabehi wori bana baba bambaru iti hangko i bana lena maalusu hai makumba au rasula hai lero malewau, malentoro hai malei. 37 Nubabehi arii bana baba iti, lima kauna hangko i kau akasia hai nulapisi bulawa, hai lima mbuana popekaina hangko i bulawa. Nubabehi wori lima mbuana popabusaana hangko i tambaga.