Pue Ala mopene podandina hai to Isaraeli
24
1 Hangko indo, mongkorami Pue i Musa, Nauli, “Mempanaikau mai oio, Haruni, Nadab hai Abihu hihimbela hai pitu pulona tadulakonda to Isaraeli, menomba ngkaraokau Iriko. 2 Agaiana batena pea Musa au peisa hungku Iriko. Au ntanina, inee gagahe hungku; nodo worihe to Isaraeli, ineehe mempanai i bulu Sinai ide.”3 Roo nodo, laomi Musa mopahawe i to Isaraeli hinangka ngkorana Pue hai ope-ope atura au napahawemi Pue iria. Mewali mehanahe to Isaraeli hihimbela, rauli, “Hinangka ngkora au nauli Pue iti, kipeulai haha.” 4 Roo indo, naukimi Musa hinangka ngkorana Pue iti. Kahalona madondo-dondo, naaromi Musa haogu meja pohuwea popenomba i Pue i biti bulu Sinai iti. Naaro wori hampulo hai roogu tugu moula tinanda to Isaraeli au hampulo hai rontina. 5 Musa motuduhe bahangkia to Isaraeli au mangura-ngura mohuhuhe popenomba au rahuwe hai mosambalehe japi laki bahangkia baana au mewali popenomba podame i Pue. 6 Roo nodo, Musa moala hanggaa wahe japi iti, nawoli i loia hai hanggaa mbuli nabumbuha i wongko meja pohuwea popenomba. 7 Naalami sura mpodandi au napoukiimi hinangka parentana Pue iti, hai nabasaahe to Isaraeli maoni-oni bona rahadi. Ido hai mololitahe, rauli, “Kipeulai Pue hai kibabehi hinangka parentaNa.”
8 Roo nodo, Musa moala wahe au napatimamami inona hai nahimpeahe to Isaraeli, hai nauliangaahe, “Wahe ide mopakaroho podandi au napaarami Pue hai ikamu au mepangka i hinangka parentaNa.”
9 Hangko indo, mempanaimohe Musa, Haruni, Nadab, Abihu hai pitu pulona tadulakonda to Isaraeli. 10 Mewali raita mpuumi Pue Ala au rapenombai to Isaraeli; meangka i wongko hambua au nodo lanta hangko i watu nilam, hai malewau nodo langi au mewangka. 11 Mewali tadulakondahe to Isaraeli iti moitamohe Pue Ala. Nauri nodo, barahe Napapate. Roo indo, maandemohe hai maenumohe.
Musa i bulu Sinai
12 Mongkorami Pue i Musa, Nauli, “Mempanaiko mai hawe i wowo bulu bona Kuweiko watu au Kupoukiimi hinangka atura hai parenta au ina nupaturoahe to Isaraeli.” 13 Hangko indo, mangkadipuramohe Musa hai Yosua, topeharongina, bona mempanaihe i bulu paidaana Pue. 14 Agaiana Musa mololita i totosaenda to Isaraeli, nauli, “Nipegiamongkai inde, hawengkai mesule. Idetohe Haruni hai Hur niporanga inde. Hema au ara kara-karana, peisa lao napololita irihira bona raurusi.”
15 Mewali, mempanaimi Musa i bulu Sinai au nabalungkuhi gawu. 16 Peawana Pue mendaulu i wowo bulu Sinai. Inimi alona bulu iti nabalungkuhi gawu, hai i alo kapitu Pue au ara i lalu gawu iti mokakio Musa. 17 Peawana Pue i wowo bulu iti, nodo api au lolaa raita to Isaraeli. 18 Mewali mesuami Musa i lalu gawu iti hai mempanai liliu hawe i wowo bulu Sinai. Musa inditi iba pulona alona iba pulona wengina kamahaena.