Kahintimba hai kanoto
23
1 Ineekau motabaraka bambari au bara tou; ineeko motulungi tauna au masala hai mewaliko sabi au bara tou. 2 Ineekau kaula-ula i tauna au mobabehi dake. I lalu posabimi i hambua kara-kara, ineekau kaula-ula i tauna au mopahala batakahe atura hai posabinda au bara tou. 3 Inee worikau mamperurui tauna i lalu kamasalanda, nauri au raparesa iti topeahi-ahi.4 Ane niita japina iwalimi ba kalidena au meloho, nipakala hai nianti i ampuna. 5 Ane niita kalidena iwalimi madungka anti kamantimina antiana, inee mahika poinaomi. Niaho antiana hai niaro; inee nipalehi nodo pea.
6 Ineekau mopangka-pangka topeahi-ahi, ane mohawira kara-karana i peparesaa. 7 Ineekau mohowara perai au bara tou. Tauna au bara masala hai au manoto inee nipapate, lawi baraNa ina mopamanoto tauna au masala. 8 Ineeko modoko pepaimpohi, lawi pepaimpohi mopamakaindi matanda tauna au meita hai mopahala bataka kara-karanda tauna manoto.
9 Ineekau mampopeahi-ahi tohandarena; lawi hangkoia nipebasangimi mewali tohandarena i tampo Masiri.
10 Ini parena kamahaena peisakau motudai bondemi hai nipupu wuana. 11 Agaiana i kapituna parena hangangaa nikabaha bona hampare iti topeahi-ahi au arahe i olomi peisahe molambi paandenda, hai apa au rapentara rapalikangaami raande binata maila. Nibabehi wori nodo i bonde anggoromi hai i saitunmi.
12 Ini alona mampobagokau bagomi, agaiana i alo kapitu hangangaa mengkarookau bona japimi hai kalidemi barahe mobago. Hawimihe hai tohandarena au mobagohe irikamu, hangangaa mengkaroo worihe.
13 Hinangka au Kupahawemi irikamu hangangaa nipailalu. Ineekau menomba i anitu, mogalori hangana bara peisa nikakabelai.
Atura mpenomba hai alo-alo mahile
14 I lalu hampare, hangangaa talu belami mosusa mampomahileNa. 15 Posusa Roti au Bara Raragii hangangaa nibabehi i pare-parena. Nodo au Kuparentaiamokau: Pitu alona kamahaena hangangaa maandekau roti au bara raragii, i tempo au tepatokami i wula Abib, lawi i wula itimi pesuwumi mai hangko i tampo Masiri. Agaiana bela-belami mai menomba Iriko, hangangaa moantikau popenombami. 16 Nibabehi Posusa Popupu Wua Tuda-tuda au Nguru-nguruna ane mepongkamokau mopupu wua tuda-tuda i bondemi. Nibabehi wori Posusa Popupu Wua Tuda-tuda Au Kaopeana, ane mopupukau wua tuda-tudami au kahopoana. 17 Talu belana i lalu hampare i tempo kaniposusaina, ope-ope tobalilo hangangaa maihe menomba i Pue Ala au nipenombai. 18 Ineekau mampopenomba roti au raragii i tempomi mohuhu popenomba rasambale Iriko. Hai taba pinatuwo au nipopenomba Iriko, inee niwoli hawe madondo i tempomi mosusa. 19 I pare-parena wua tuda-tudamu au nguru-nguruna hai tepamaroa, hangangaa nupupu hai nuanti i souna Pue Ala au nupenombai. Inee nudaka ana towau hai owai tomiana inana.”
Dandi hai pekambaroa i to Isaraeli
20 “Tou, Kutudumi hadua malaeka molumao iorumi bona mokampaikau i rara hai moninikau lao i paidaa au Kupasilolongami. 21 Nikampai watami hai nipehadingi lolitana. Ineekau meewa iria. Ane masalakau, barakau ina naampungi lawi kuasaNgku ara iria. 22 Agaiana ane tou-tou nipeulai lolitana hai mobabehikau hinangka au Kuhawaakau, ope-ope iwalimi ina Kuewahe hai Kupombealaahe. 23 Lawi malaekaNgku ina molumao iorumi hai naantikau i tamponda to Amori, to Heti, to Feris, to Kanaa, to Hewi hai to Yebusi, hai ihira ina Kupaonehe. 24 Ineeko menomba i anitunda hai inee nipeulai ada mpenombanda. Agaiana ope-ope watu tauna au rapenombai, hangangaa nirupu-rupuhe, hai ope-ope arii watu au rapake menomba, nitepohe. 25 Agaiana ikamu, hangangaa menombakau i Pue, Pue Ala au nipenombai. Mewali ina Kuwatikau hai paande hai paenu, hai haki Kupakarao hangko irikamu. 26 I tampomi, bara ina ara towawine au maingihi ba lalo. Ikamu ina Kupamatinuwukau.
27 Ngamba-ngamba au nikahawei ina kupopewalihe langa Iriko. Ina Kupawulihe, hai ope-ope iwalimi ina mabalihe. 28 Iwalimi, iami to Hewi, to Kanaa hai to Heti, ina kupamagunegohe hai Kuwurahe hangko i lindomi bona peisakau molumao liliu. 29 Barahe ina Kuwura hambelalau hangko i lindomi i lalu hampare bona tampo iti bara mewali boa hai binata maila bara ina melumbu kabosanda hangko irikamu. 30 Ina Kuwurahe Kupopombeuna-una, alami memule-mule hai tampo ide nipaidai. 31 Tampana tampomi ina Kupakanoto mepongka hangko i tahi Teberau hawe i owai Eprat hai hangko i tahi Tanga hawe i pada wungi, lawi ope-ope tauna au maida inditi ina Kuhuhuhe i taiemi bona niwurahe hangko i lindomi. 32 Ineekau modandi hai ihira ba i anitunda. 33 Tauna iti, ineehe nipaliu maida i tampomi bona datikau menomba i anitunda, alana madosakau Iriko. Ane menombakau i anitunda, manawomokau.”